Kat dang mih ki sngi i kwah ki paidbah na ka thaaiñ Block-I namo napoh ka Elaka Labang Nangphyllut dang joor i wow chah kynthup biang chapoh ka jylla Meghalaya.
Ha kani ka kynti da pynsñiaw ki yei kwah ki wow chimbynta noh ha ka Election MLA ka jylla ka wow man ha uni u snem.
Ynne ka sngi neiliang u Wyrta da hiar u cha ki kattu katni ki chnong ha khappood wa ka Assam wei da chem wa pdiang ki yaki bru na Block-I wow wan thap Vote ki ha ki Polling Station wa em ha chnong yong ki.
Hawa yachem wa u Ewanmi Lathong uwa man u Secretary ka chnong Saba da pynsñiaw u wa neiliang ka chnong chirup wa u Waheh Chnong wa ki Executive Member hi da pynbait ki wa ki bru wa em na Block-I kiwa da em pyrtuid da pdiang sñiawbha ya ki wow wan thap Vote ha ka chnong.
U Waheh Chnong ka Mukroh, u Hamboide Sumer da ong u wa neiliang ka chnong heiyatoh wa i wan thap Vote ki Pnar na Block-I ha Mukroh, ym em u wit ki.
Heijooh i por u Chairman ka Mukroh u Deibormi Lamin da pynrap u deiwa ong wa heiyatoh wa i wan thap Vote ki paralok na Block-I lada em wa wit næ chah pynwit chah maham chah pyntieñ ki ha luti syngkieñ ha ka sngi thap Vote næ chwa kani ka sngi ye ki wow pyntip cha ki bor chnong khnang wow ye ki u pyntip cha ki bor ka aiñ.
Neiliang won u Asst. Waheh Chnong ka Barato, u Shiborlang Lamare da pdiang sñiawbha u ya ki paidbah na Block-I wow wan thap Vote ki ha ka Polling Station ha chnong Barato kam ki khon ka Meghalaya waroh khnang wow yoh ki wow man ki kam kiwa chong chnong yong ka Meghalaya.
Kam wow kdaw heini dang ye ki bru wow pynpsiah pyrtuid kam kiwa thap Vote hadooh ka 28 tarik uni u bnai.
