U kyrtong ka NPP na Nongkrem uwa man leh u Montri ha ka sorkar MDA, u Dasakhiatbha Lamare da ong u wa i pynbaad wa saam poisa neibynta ka Election toh i wym sñiaw yahaap neibhah hadooh katni ympu em u pynbna ya ka Election wei ka Model Code of Conduct leh ympu em krehkaam ko.
Kam wow kdaw heini wa kattu katni ngut kiwa chong chnong ka Nongkrem Constituency da ujor ki cha u Chief Electoral Officer (CEO) ka jylla pyrchah ya u Dasakhiat heiwa da pynbaad wa lai saam poisa u ha kani ka Constituency neibynta wow myntoi na ka Election, wei neiliang u CEO da phah u ya ini i ujor cha ka Deputy Commissioner ka East Khasi Hills khnang wow takit wei wow pynchitom.
Hawa klam ynne ka sngi, u Dasakhiat da phylla u ya ini i rukom ujor neibhah wot u CEO leh da klam che u wa ya ka Model Code of Conduct næ ki kyndon aiñ Election ym pu krehkaam ki. Da ong u wa oo da e yarap u cha kiwa emkaam hawa ood ki wei hawa em ka laad e yarap, deiwa pynrap leh wa ymtoh du katni tangwa ka yung yong oo yarap ko wei boonsien i yarap toh cha ki bru kiwa emkaam.
Da pynsñiaw u wa ymtip u wa kiwi em ki i sñiaw wa kammon wei hajrong kawon ka yurim kitæ ki bru da ujor ki, tangwa da ieh won u ha i stat ki bor wa toh u pait kammon mut ki wow leh wei ka aiñ daw batai ko. Chooh chooh da ong u wa lada chah pynchitom du neidaw wa yarap ya kiwa emkaam daw pdiang u yei pynchitom.
Chooh chooh da ong u wa ymtoh wow sñiawthooh bakla neibhah wa i yarap da lai i da ki phaw snem ym du heipor Election, tangwa da pyrchang u leh wow saam ya i kyrkhu wa da yoh ka yung ka sem.
