Ka Meghalaya Pradesh Congress Committee, ynne ka sngi da pdiang sñiawbha ko ya ki 5 ngut kiwa da wan wow psiah chapoh ka Party kam chibynta wow pynkhreh ya ka Election MLA neibynta u snem 2023.
Ha kani ka yalang wa da pynman ha Shillong da emlang leh u President wa thymme ka Congress u Vincent Pala, u President warim u Dr. Celestine Lyngdoh, ki MLA kam ka Ampareen Lyngdoh, u Charles Pyngrope, u M. Rapsang wa kiwi kiwi de.
Kiwa da chah pdiang sñiawbha da kynthup lang ya ki ya u R.G. Lyngdoh, u PN Syiem, u M. Wansett, u Ardent Mylliem wa ka Dr. Fenela Nonglait.
Kiwa da klam ha kani ka sngi da ong ki wa ini toh kam chibynta wow pynkhreh ya ka Election heiwa ha u 2023 da toh biang i por ka Congress wow wan hei bor neidaw wa em ko ya ki bru wa yahkhmat wa chemphang wei deiwa pait yei long i man hapoh ka jylla da tikna wa ka Congress daw wan biang ko hei bor ha u 2023.
Da ban joor ki leh yei emkaam wow man kiwa yatylli hapoh ka Party wei ymtoh u ya taan tylle uwi ya uwi.
U R.G. Lyngdoh hawa e yei klam da e khubei u ya u Vincent Pala uwa da ye wow pynngait ya oo wa datoh i por wow liwan yung biang u deiwa pynrap u wa ym em yut u tangwa da man hi-eh u kam u lok wa suki hi eh.
Da ong u leh wa sa iwi i daw wa pynman ya oo wow wan biang u cha ka kaam saiñ hima sima toh hadien wa yoo yei man katni hapoh ka nongbah Shillong wa ha ka jylla hi waroh kawi wa i rukom synchaar wym biang wa i eh i khoo ki paidbah iwa da pynman ya oo wow chim ya ini i rai.
Chooh chooh da ong u wa Party ym em ko kiwa yahkhmat kiwa yang nadien neibhah uwon uwon uwa yah nakhmat kwah u du wow pynwiar ya uwon uwon uwa ye u chim yei bor heithaw wow pynchlur wow manlang kam kiwa yahkhmat.
Kamtæ da ong u wa ha u Vincent da em u bru uwa bien u ya krehlang wow yaklamlang wei itæ man i iwa emkaam yow khur lut ya u 2023.
