U MLA ka KHNAM na North Shillong, u Adelbert Nongrum da pynsñiaw u yeiwa pdiang u yei tyrwa yasuk wei wow pynbait noh ya i yasñiawthooh bakla wa u Pyndapborthiaw Saibon.
Ka muktiar u Adelbert, ka Gardenia Challam da ong ko wa ha ka ujor u Pyndapborthiaw Saibon cha ka Election Commission of India wei wa ka Writ Petition cha ka Kasari deiwa kam wa man u kam u President ka KHNAM, da wanrah i ya i kulmar ha ka Party wa ki paidbah, tangwa kani ka ujor da chah kyntait noh ko wei da pynksan wa u Adelbert u dang man hi u kam u President ka KHNAM ryngkat ki sabut kiwa biang.
U Adelbert da ong u wa ha i lai luti wa da jan dap 20 snem ka KHNAM ymye ko u poi cha ka thong neibhah wa boon ki wym sñiawthooh hapoh ka seiñ, wei kam uwa yahkhmat man u uwa smat wow pdiang yei tyrwa u Pyndap wow yasuk wei wow pynbait noh ya i kaam.
Da pynrap u leh wa katwa dang yaleh para ki, dang pyntlot i ya ki khamtam hawa yoo chiboon ki mat ka jaitbru wa hap pyndep.
