Ka BJP Meghalaya da phah ko yei pyrtuid ka Sukhi Pariat yow man kam ka State President Mahila Morcha kawa man ka chnat ki kynthai ka Party hapoh ka jylla.
Yeini da leh katkam ka riti ka Party hapoh ka r Article-XVII (1) wa (3) yow chim rai ki khlieh dooh ka Party wei yow mynjur ki leh yei pyrtuid ka Sukhi Pariat, da pyntip u Ernest Mawrie, President ka BJP Meghalaya.
Ha iwi won i liang, ka Bharatiya Janata Yuva Morcha (BJYM) kawa man ka chnat ki khynroo ka BJP, kam chibynta wow pynkhlan ya ka Barty ha ka Election MP cha ka Lok Sabha kawa daw pynman ha u snem wow wan, da phah ko yei pyrtuid u Deepan G Momin wa u Akki M Sangma kam ki Vice President, u Joydeep Ghosh wa u Anish M Sangma kam ki General Secretary, u Koster Diengdoh kam u Secretary wa u Varun Kumar kam u Treasurer deilang wa 6 ngut ki Executive Member.
Kani ka chnat khynroo kam chibynta wow lehkmen yei dap 9 snem ka sorkar u Modi da kynjoh ko cha ki wow thap Vote hei sien nyngkong lyngba ka Mahasampark Abhiyan deiwa pynman da ka Online Governance Quiz hajrong ki kaam wa da ye wow leh da ka sorkar NDA wa yahkhmat da ka BJP kawa da pynman ha ka 24 wa 25 tarik uni u bnai.
Ka BJYM ha ki bnai wow wan daw lai ki cha waroh ki District deiwa ya krehlang wa ki Mandal Unit yow pynboon ya ki dkhot ka Party yow kreh neibynta ka Lok Sabha Election. Kam chibynta ini daw lai pynche leh cha ki khynroo ka Meghalaya ya ki Scheme wa da wanrah da ka sorkar pyrdi yow pynyoh kreh ya 10 lak ngut ki khynroo ka ri lyngba ki Rozgar Mela.
