Ka mukotduma PIL wa da yaleh heiyatoh wa duna ki thaw thang-bru, da chong bichaar biang ka ynnin da ka High Court ka Meghalaya da u Justice I.P. Mukerji, Chief Justice wa u Justice W. Diengdoh, Judge.
Kani ka mukotduma toh neibynta ki Hindu, ki Khasi wa Jaiñtia kiwa thang yei metyap heiwa hadien wa ka High Court da pyrchang ko wow pynhun ya kini ki le liang wow pynemkaam da ka jooh ka thaw thang, tangwa ym em wa mynjur heiwa ki Khasi-Jaiñtia da kwah ki da ki yong ki hi.
Sa iwi wa da chem leh toh wa da sdang duna i thaw tlep ya ki Christan kiwa em jar jiar ki Balang kiwa da em leh jar jiar ki thaw tlep-bru wei kawi ka Balang ym chah ko ya kiwa na kiwi ki Balang wow tlep hei thaw tlep yong ki.
Kamtæ da ong wa da sñiaw emkaam wow em kawi ka thaw tlep-bru neibynta waroh ki Balang Christan wei yow pynbait yeini da thung da u Amicus Curiae uwa da phah chong yachem wa waroh wa kynthup ya ka sorkar yow chim ya ka rai.
Ha ka hukum wa da pynmih ha ka 7 tarik uni u bnai, da phah ya u Chief Secretary ka jylla wow thung ya ka Committee wa em ki dkhot wa emkti ha ini i kaam yow ye u ya pynbait hapyrdi ki Hindu, ki Khasi, Jaiñtia wa ki Balang Christan. Da phah leh wow thooh thaw yow pynman kam ka Common Cemetery namo ka thaw tlep-bru wa pynemkaamlang da waroh ki Balang Christan.
Neiliang u Amicus Curiae da pyntip u wa dadep u wow khut pynman yalang wei daw pynman chooh yow ye u pynbait yeini wei da em leh ki Hindu, ki Khasi wa Jaiñtia kiwa da ya mynjur wow em da kawi ka thaw thang-bru wow pynemkaamlang wei lada ye u pynhun sa ya kiwi leh, kani man ko kawa biang dooh. Lada ym ye won daw hap ka Committee wow thooh thaw thang-bru.
Kamtæ ka High Court da phah ko wow pynman rap boon ki Meeting yow chim noh ya ka rai.
Discussion about this post