Phah ka sorkar pyrdi ya ki jylla wow man kiwa pynkhreh hadien boon kiwa yoh kjut ha China

Heiyatoh wa i mih khubor wa pynyoo yei ku kiwa yoh kjut deiwa chitom u riñ mynsien ki khynnah ha North China ha kini ki tayaaw wa da lai, neiliang ka Ministry of Health & Family ka sorkar India da rai ko wow pait yei pynkhreh pyrchah ya ini i kjut yow ye u yada.

Ya ini da leh deiwa pyrkhat wa kattæ toh i por wa joor kiwa yoh synrum iwa daw wanrah leh yei kjut wa chitom u riñ mynsien, kamtæ ka sorkar da pait bniah ko yeini deiwa ong wym emkaam wow khuslai.

Ha ka chithi wa da phah da u Union Health Secretary cha ki jylla wa ki UT, da phah ya ki wow pait smat yei long i man i chait i khiah ki paidbah wa i pynkhreh ki Hospital deiwa pynbiang ya ki thaw thiah, ki dawai wa ki tika neibynta ka Influenza, ka Oxygen, ki dawai Antibiotics, ki tiar ki tar yada, ki Ttesting Kit waki Reagent, kamjooh i krehkaam ki Oxygen Plant waki Ventilators wei wow pynman ya ki thaw sumaar kiwa khooid.

Da phah leh ya waroh ki jylla wa ki Union Territory wow pynkrehkaam ki yaka ‘Operational Guidelines for Revised Surveillance Strategy in the context of COVID-19’, kawa da dep phah chwa uni u snem yow pait bniah lada em kiwa yoh kjut Influenza Like Illness (ILI) waka Severe Acute Respiratory Illness (SARI).

Related posts

Sdang ka Woodland WK Hospital yei pynkha khon wa khlem kjut iwa nyngkong dooh hapoh ka West Jaiñtia Hills

March 22, 2025

Pynman ka Jowai City YMCA ya ka Health Camp neibynbta kiwa da heh rta

March 21, 2025

Chooh chooh da phah wow booddien bha ya kiwa em ki dak ki chin wa yoh ILI/SARI deiwa sdang ya ki District wa State Surveillance Unit yong ka Integrated Disease Surveillance Project (IDSP), khamtam neibynta ki khynnah wa kiwa dang khai khynroo. Yeiwa chem ki hajrong ini toh u Upload cha ka IDSP- IHIP Portal.

Sa iwi wa da phah ya ki jylla toh yow phah ya ki nongmuna wa da chim na kiwa kjut kiwa yoh SARI, khamtam ki khynnah wa kiwa dang khai khynroo cha ki Virus Research and Diagnostic Laboratories (VRDL) wa em ha ki jylla yow Test iyi u khñiang yoh ki. Wei deiwa leh ya ini waroh da yooluti wa daw ye u yada ya kiwa chong chnong.

Katkam wa pyntip ka WHO, kini kiwa yoh ya ini i kjut chitom riñ mynsien ha North China toh kiwa yoh synrum namo ka Influenza wa leh u khñiang Mycoplasma Pneumonia, u SARS-CoV-2 wa kiwi de. Ka WHO da ong ko leh wa ini wa sdang yoh kjut ki bru ha China toh neidaw wa da pynduna yei kyndon yada COVID-19 wei wa da wan leh i tlang iwa da pynman ya i Mycoplasma Pneumonia u poor i. Chooh chooh ka WHO da paan ko leh naka China wow khana bniah ya ini wa da jia wei ymtoh wow khuslai ki paidbah ha ini i por.