Phah ka sorkar pyrdi yaka sorkar Manipur wow pait lada ye u pyndooh yei man ST ki Kuki

Ka sorkar pyrdi da phah ko yaka sorkar Manipur wow pait ko lada ye wow pyndooh noh ya ki jaitbru Chin-Kuki wa ki Zomi wow em pyrtuid ki hapoh ka Scheduled Tribe List ka Manipur.

Ka Tribal Affairs Ministry ka sorkar pyrdi da pyntip ko wa da yoh ko yaka chithi na u Maheshwar Thounaojam, National Secretary ka Republican Party of India wei uni u bru toh uwa na Imphal.

Ha waroh u snem 2023, ki Metei kiwa em ha Manipur da kwah ki wow em ka jaitbru ki hapoh ka ST List ka Manipur wei da em leh ki Meitei Pangals (Meitei Muslim) kiwa da kwah leh yei tipmit tangwa ini da man i sien wa nyngkong wa em i dawa wow pyndooh yei pyrtuid ki Kuki wa ki Zomi naka ST List deiwa e daw wa kini ymtoh ki tre chnong.

Ka sorkar pyrdi haka chithi wa da thoh haka 26-12-23 da ong wa yow yoh yei tipmit wei wow pyndooh yei tipmit hap wow wan i tyrwa naka sorkar jylla kawa kwah wow leh yeini, kamtæ da paan pynche naka sorkar Manipur lada kwah ki wow leh yeini.

Related posts

Kwah u George wow psiah biang cha ka Congress yow yakhun MDC

December 23, 2024

Pynbna ka NPP sa 6 ngut ki kyrtong MDC cha ka JHADC

December 23, 2024

U Maheshwar Thounaojam da ong u wa da dep u wow yachem wa u Tribal Affairs Minister, u Arjun Munda heiwa da e kti u leh yaka dorkhat heiyatoh wa ini deiwa ong wa ki Kuki deilang wa ki Zomi ymtoh u yoh myntoi ki kam ki ST iwa da e da ka Constitution ka ri.

Da e nongmuna u leh wa ka Supreme Court haka hukum wa da dep pynmih ko heiyatoh waka jylla Maharashtra ha ka 05-01-11 da ong ko wa kitu ki wym toh ki tre chnong ka ri kiwa wan na kiwi ki thaw ymtoh u yoh ki yei tipmit kam ki ST.

Kamtæ u Thounaojam da ong u wa ki Kuki deilang wa ki Zumi ymtoh ki tre ri tangwa kiwa da wan yut chnong te poi ki chapoh India wei ini mut i wa ki ymtoh ki tre ri ka India.

Kam wow pynkynmoo wa i kynaad i ya umsnaam ha Manipur da sdang i hadien wa ka Manipur High Court da phah ko ya ka sorkar Manipur wow tyrwa cha ka sorkar pyrdi wow tipmit noh ya ki Meitei kam ki ST ka Manipur.

Hadien ini neiliang ki Kuki da yakhih ki neidaw wa lada ki Meitei yow ki yei tipmit kam ki ST daw ye ki wow thied yei thaw ki Kuki neibhah ha ki bynta wa sah ki Kuki ha Manipur du kiwa man kam ki ST ka Manipur kiwa ye u thied thaw wei da tieñ ki neidaw wa ki Meitei toh kiwa da khlanbor chwa daw yoh bor chooh chooh ki.