U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong da pyntip u wa ya ka yingkieñ ha Dwar Ksuid kawa em ha u sarok Shillong Bypass u chna noh ya ka wut wut, katwa ya ka yingkieñ nar næ ka Bailey Bridge wa da siang da ki dieñ soodong daw siang noh da ki Steel næ ki kynja nar yow lait nei tlot wa jia ma jia.
Da pyntip u leh wa ha ka sngi Thohdieñ da khut ya ka yalang wa u Regional Officer ka National Highways Authority of India (NHAI) deilang wa u Additional Chief Secretary wa ki Engineer yong ka PWD.
Hawa yatoh won wa i sih ka yingkieñ naar, u Montri da ong u wa i lai boon tylli ki kari kiwa khia wei ki dieñ wa da siang ha katai ka yingkieñ ye ki wow kit du kamwa 40 Metric Ton, katwa ki kari kiwa lai toh kiwa heh hadooh 12 wa 14 chaka iwa da pynkhliah ya ka yingkieñ.
Da pyntip u leh wa da phah ya ka NHAI wa toh u pynbiang yow ye katai ka yingkieñ wow chakri deiwa paka, wei da phah leh wo siang noh da ki Steel heithaw ki dieñ iwa daw leh noh ym slem de.
Ha iwi won i liang, u Prestone da ong u wa ka yingkieñ khyndawbilat kawa da sih noh ha Dwar Ksuid, ka sorkar da rai ko wow chna noh smat, wei da pyntip u leh wa i pynlut wow chna ya katai ka yingkieñ ym toh na ka sorkar wei daw pynlut na ka NHAI.
