Hadien wa mih khubor wa u Montri Kaam Pohyung yong ka ri India, u Amit Shah ye u wow poi ha nongbah Shillong ha ka tayaw wa ar ha uni u bnai, neiliang ki Chief Executive Member yong ka Khasi Hills Autonomous District Council wa Jaiñtia Hills Autonomous District Council da yachem ki ya u Montri Kaam Pohyung ka jylla yow pynlai chakhmat hawa yatoh wa i pynbait ya u pood u ang.
Hawa klam ynne ka sngi, u Lahkmen Rymbui da pyntip u wa i yachem ya ki CEM yong ki ADC man ko wow paan yarap lang hawa yatoh wow yaklam pynbait ya u pood lada wan u Amit Shah, wei da ong u leh wa ha ini i wan u Montri ye leh wow em i yaklam wa kyrpang ya u pood u ang.
Da ong u leh wa ka sorkar ka kwah ko wa ki District Council lada em ki ya ki phang wow pynsñiaw hawa yatoh wa ki kaam khappood, toh u leh ki deiwa e lyngba ki kot ki sla, khnang wa ka sorkar lada yachem ko ya u Shah, u emlang ki kot ki sla kiwa biang.
Da ong u wa ka sorkar ka kwah ko ya ki phang yong ka jylla yow pyrchang u pynbait noh ha ini i wan yong u Montri, wei neibynta ini, da emkaam leh ya i yarap yong ki District Council, deiwa pynsñiaw wa ka chnat kwah ko wow pynkhreh lada em iwon iwon i yaklam.
Ha iwi i liang u Rymbui da ong u wa ka sorkar jylla daw leh ko ya iwa emkaam hawa yatoh wa i booh ya ki Police Outpost ha ki thaw khappood wei kamjooh hawa yatoh wa i pynbait ya u pood u ang ha ki 12 tylli ki thaw wa da tipmit wa em i yaphær.
