Hadien wa ini wadep da em kiwa da wan chakhmat wow pyntip wa chah tooh chah lute ki heipor wa chong Taxi ha Shillong, neiliang ka sorkar Meghalaya da phah ko wa waroh kiwa yah kari kamai wow hap ki wow biah da ka kynja ID hapoh kari yow pynyoo yei pyrtuid, i thaw sah, i Number kari wa chaphang ka Driving License ki.
Yeini i rai da chim ha ka yalang wa da chongknor da u Symbood Montri Rangbah, u Sniawbhalang Dhar uwa pait leh ya ka chnat Transport deiwa emlang leh u Montri ka chnat Tourism, u Paul Lyngdoh deilang ki heh sorkar ynne ka sngi.
Katkam wa da phah da ka sorkar, waroh kiwa yah kari kamai hap ki wow rahlang ya ki kot ki sla wa emkaam ka kari kamjooh yei yong ki samen yow ye u pait u sylli ha iwon iwon i por.
Kam wow pynkynmoo wa ini wadep da em kawi ka kynthai wa chong Taxi kawa da chah tooh ki sahchkoor ksiar hadien wa wiar yong bru ko syndet-syndet deiwa suba wa emkti uwa yah kari deilang wa ar ngut ki kynthai kiwa da psiah hapoh kani ka kari wa da ku ko na Motphran cha Dhankheti.
Hadien ini da em leh uwi uwa da ong wa chah tooh ka poisa heiwa oo leh da wiar yong bru u heipor wa chong Taxi.
Ka sorkar da yooluti ko wa deiwa phah wow booh kam kini ki ID deiwa yoh kiwa chong kari u tip chaphang uwa yah kari daw pynduna ko ya kam kini ki jait kaam pyrchah aiñ.
Discussion about this post