Ynne ka sngi hadien i khlaad syndet uwi na ki heh ka seiñ UDP uwa da jooh man leh kam u MLA wa u MDC ka Party na Ri-loom Jaiñtia, neiliang ka seiñ UDP da phah ko ya ka khubor pyntngen ya ka yung ka sem yong oo.
Ynne i janmiet ka seiñ da khut ko ya ka yalang wa jhan ha Shillong heiwa ki dkhot yong ka da pynsñiaw ki yei sñiawsih wei sahnood wa khroo yeini i jia.
Ka seiñ da ong ko wa u Ma Mihsalan da man u bru uwa skem ka yurim wei da yoh u yei yaroh ha ki kaam yong oo khamtam i mynsien wa sñiaw khian wei khooid chida yong oo.
Da ong ko leh wa i khlaad yong oo da man i doohnong wa khroo ym du ya ka yung tangwa ka Party wa ka Ri-loom Jaiñtia hi waroh kawi.
Neiliang ka Party da phah ko leh ya ka khubor wyrai kamjooh i mynsien wow pyntngen ya ki khon ki kti, wa ya ka yung ka sem waroh kawi deiwa kyrmen wa u Blai daw e u ya ki i kyrkhu kyrdoh wa i chait i khiah wa sarot tam.