Ynne ka sngi ka sorkar jylla da pynmih ko ya ka hukum wow thung ya ki dkhot yong ki le tylli ki Regional Committee wow sylli yei man i long ha ki thaw khappood waka Assam ha ki thaw wa kynthup ya ka Tarabari, Gizang wa Hahim hapoh West Khasi Hills, Boklapara wa Khanapara-Pillangkata ha Ri-Bhoi wa ha Ratacherra ha East Jaiñtia Hills.
Hapoh Ri-Bhoi u Symbood Montri Rangbah ka jylla, u Prestone Tynsong u man u kam u Chairperson, u Dasakhiatbha Lamare uwa man u montri ka chnat PWD (Building), u MLA ka Nongpoh u Mayralborn Syiem wa u MLA ka Jirang, u Sosthenes Sohtun u man ki kam ki dkhot katwa ka Deputy Commissioner won kam ka Member Convenor.
Ha West Khasi won u Montri ka chnat PHE, u Renikton L Tongkhar u man u kam u Chairperson, katwa u MLA ka Nongstoin, u Macmillan Byrsat, u MLA ka Mawshynrut, u Gigur Myrthong wa u MLA ka Rambrai Jyrngam, u Kimfa S Marbaniang kam ki Dkhot katwa u Deputy Commissioner ka District won kam u Member Convenor.
Ha East Jaiñtia Hills, u Sniawbhalang Dhar Montri ka chnat Transport kam u Chairperson, u Montri ka chnat ki Kaam Pohyung, u Lahkmen Rymbui, u MLA ka Mowkaiaw, u Nujorki Sungoh wa u MLA ka Sutnga Saipung, u Shitlang Pale kam ki dkhot katwa u Deputy Commissioner ka District won kam u Member Convenor.
I kaamram kini ki Committee toh wow sylli ya ki chnong wa ki dong kiwa da kam da ka Meghalaya deiwa pait yei pyrtuid kiwa da em hapoh ka Register ka Assam; wow pait yei thaw wa em ki chnong nadooh neiwon sdang wei hadooh heiwon kut ki, katwon ngut em ki bru hapoh kini ki chnong, wow pynkhreh ya ka ‘As-is’ Public Asset Register ha kini ki chnong, wow lai cha kini ki chnong wei wow yaklam wa kiwa chong chnong deilang wa kiwa mihkhmat cha ki District Council yow tip bniah hajrong i sñiaw kiwa chong chnong, wow chim yukheiñ heiyatoh wa i jngai kini ki thaw wa ki yung krehkaam sorkar kamjooh leh wow khut ya ki sahep ka chnat Forest Department hawa emkaam.
Ya kini ki Committee daw yarap hei wow pyntoh pyntne ya ki kot ki sla wa kiwi kiwi kiwa emkaam da ki Deputy Commissioner wei heijooh i por leh ki Member Convenor toh u pynbait ki wa ki sahep neiliang ka Assam heiyatoh wa ki tarik wow chong yaphyllu yumut wei wow lai cha kini ki chnong.
Chooh chooh da phah wa ya ka Bui (Report) wa chem ki Committee toh u phah cha ka sorkar jylla hapoh 30 sngi heiyatoh wa i chem yong ki deiwa kheiñ ya parom hiar pateiñ kini ki chnong, ki jaitbru wa em ha ki chnong, i suk ki paidbah wow yoh yei synchaar khaddar, i rukom man u pood wa i sñiaw yong ki paidbah wa im ha kini ki thaaiñ.