Ka yung bichaar ka Sontipur District ka Assam ha kani ka tayaaw wa dep da phah kset (Judicial Custody) ko ya u Mahbubul Hoque uwa man kam u tre wa u Chancellor ka University of Science and Technology Meghalaya (USTM).
Ya u Hoque da kem ha ka 22 tarik u Thohlakhmi (Feb) na yung wa sah u ha Guwahati deilang wa 5 ngut kiwa sikai ka skur wa em ha Sribhumi District, ka Assam deiwa chah pynbaad wa yarap leh tooh ki ya ki khynnah wa yaleh Class-XII ka Central Board of Secondary Education (CBSE).
Ha ka 3 tarik uni u bnai, ka Gauhati High Court da e jamin ko ya oo heiyatoh wa kani ka yaleh Exam tangwa da em waroh 6 tylli ki Case pyrchah ya oo wei deiwa em kani ka jamin da lait u nei chah kem heiyatoh wa ki Case wa da Register ha Gossaigaon, Kokrajar wa Barpeta lait noh ka Case wa da Register pyrchah ya oo ha Sribhumi kawa man leh ka thaw wa sah u.
Ha ka 12 tarik uni u bnai, ki pulit ka Sonitpur District da wanrah ki ka Case wa ynru pyrchah ya oo heiwa da lai li thooh ki oo na Sribhumi. Ya ki pulit da phah ki wow kset oo da ka Judicial Custody wei wow wanrah biang oo hapoh ka yung bichaar ha ka 18 tarik uni u bnai .
U Hoque man u leh u khlieh ka ERD Foundation wei embynta u leh wow pynlai ya kiwa boon ki thaw puræ najrong ka USTM kawa haap hapoh Meghalaya ha khappood wa ka Assam hajrong uwi u loom heiwa u CM ka Assam u Himanta Biswa Sarma da pynbaad u wa i tih ya uni u loom da wanrah ko yei chlai um cha Assam deiwa pynemkaam dei kyntien “Flood Jihad”.
U Himanta da pynbaad u leh wa u Hoque da yoh u ya ka OBC Certificate deiwa leh thok ha ki snem 1990 kawa da pyndam noh u hadien, ym du ini da pynbaad u leh wa e u ya ki Certificate thok hadooh ki PhD.
Neiliang u Hoque da kyntait u ya ini waroh deiwa ong wa daw yasaaid u hapoh ka yung bichaar yow pynyoo yeiwa sakhiat wei iwon wa klam deiwa mutdur donhi.
Discussion about this post