Kiwa kyrchaan ya u MLA warim ka Ranikor, u Martin M Dango da chim ki ya ka rai wa khaddooh wow phah ieh noh ya ka National People’s Party (NPP) kawa da dep wow pynbna kyrtong ya oo wei ki da rai ki wow phah yakhun noh ya oo na ka Bharatiya Janata Party (BJP) ha kani ka Election MLA wow man ha uni u snem.
Ha chwa yong ini, neiliang u Martin M Danggo da kyntu u ya kiwa kyrchaan wow pynlait noh ya oo na i kaam wow man kam uwa mihkhmat yong ka Constituency, tangwa da ong won u wa lada ki paidbah kwah ki wow nang yakhun, u chong ha i rai yong ki na kawon ka Party u phah ki wow yakhun, heiwa da klam che u wa hadooh katni ym pu mih u na ka seiñ NPP.
Hawa yaklam wa kawi kawa yahkhmat u Danggo na Ranikor, ka Pelcy Snaitang da khana ko wa kiwa kyrchaan da chim ki ya kani ka rai wow mih noh na ka NPP toh neidaw wym biang i krehkaam wa kiwa yahkhmat kiwa em hakhmat ka Party. Da khana ko leh wa u dawa noh ya u Danggo wow Resign syndon myntu ka sngi, wei heijooh i por da ong wa i psiah cha ka BJP u man ko wow leh smat katwa ye.
Ini i rai yong kiwa kyrchaan u Danggo toh hadien wa mih ha ki laad pathai khubor wa u MLA warim ka Ranikor uwa man leh u Lamphang warim hapoh ka Yung Dorbar Chna Aiñ, ym yakhun de u na ka NPP, tangwa u yakhun noh na ka Bharatiya Janata Party (BJP) wei katkam i ong ka Pelcy, iwa pynsñiawsih ya kiwa kyrchaan toh wa kitu kiwa e ya kani ka khubor da pynjæd ki leh ya ka Party heithaw wow ya pynbait wot hawa ki bru yong u Danggo da pyrchang ki wa u National President ka NPP, u Conrad K Sangma.
