Shillong: U MLA ka BJP na South Shillong, u Sanbor Shullai da kyntu u ya ka Bharatiya Janata Yuva Morcha yong ka Cachar District, Assam wow pyndam noh ya ka ujor pyrchah ya u President ka Khasi Students Union. Da ong u leh wa ynne i miet daw thoh smat noh cha ka sorkar Meghalaya wa Assam wow tuklar wei kamjooh cha kiwa yahkhmat ka BJP ha Assam wow tuklar hajrong ini i bynta.
Ynnin ka sngi u President ka Khasi Students’ Union (KSU), u Lambokstarwell Marngar da chah ujor u ha uwa yahkhmat ka BJYM na Cachar neidaw wa wah ya i thoh wa ong wa ki Bengali ha Meghalaya toh kiwa na Bangladesh. Ya kani ka ujor da lai booh ha Thanat Silchar da u Amitesh Chakraborty uwa da ong wa ha ka 21 tarik uni u bnai da wah ya ki Banner wa da thoh ha Khyndai Lad (Police Bazaar) Shillong, kawa da kheiñ wa waroh ki Bengali ha Meghalaya toh ki nong Bangladesh kawa da wanrah yei pyrkhat kulmar ya kiwi ki jaitbru khamtam ki Bengali.
Hawa klam ynne ka sngi, u Sanbor da ong u wa man ko i wym miat wow em kam kini ki jait ujor hanla ye wow em i bakla wow thoh ya ki ktien heini heitai, deiwa ong hi wa ka jylla hi toh kawa maya yei chong suk chong saiñ.
Da ong u wa kam uwa mihkhmat yong ka BJP na ka jylla, u chim u ya i kitkhlieh wow yaklam wa uwa yahkhmat ka BJP ha Assam, u Himanta Biswa Sarma wei daw yaklam leh wa kiwi kiwa yahkhmat ka BJP ha Assam yow kyntu ki ya u Amitesh wow pyndam noh ya ka FIR pyrchah ya u President ka KSU. Da ong u leh wa daw kyntu wow e yumut wa ka BJP na waroh ar jylla wa toh u tuklar ya kani ka kaam.
U Sanbor da ong u wa kam uwa yahkhmat paidbah wa toh i kamram wow tympleh lada em kiwa e diñ, wei ha i jooh i por da ong u wa daw thoh leh cha ka sorkar Meghalaya wow khut noh ya ka All Party Meeting chwa wow man ka dorbar khnang wow ye u tympleh noh ya i diñ chwa wow kyr-ooh.
