Shillong: Hadien wa pteiñ i pynbaad pyrchah sorkar yong u President ka BJP Meghalaya u Ernest Mawrie, iwa da wanrah leh ya i thma ktien hapyrdi ka sorkar MDA wa yahkhmat da ka NPP wa kattu katni kiwa yahkhmat ka seiñ BJP, kiwa boon na ki dkhot ka BJP Meghalaya wa kynthup leh ya 2 ngut ki MLA da maham ki ya u President wow sangeh yei pynbaad pyrchah ya ka sorkar.
Uwi napyrdi kiwa yahkhmat ka BJP ha Meghalaya, uwa men leh u MLA warim, u JA Lyngdoh ynne ka sngi da thalaiñ eh u ya 2 ngut kiwa yahkhmat ka BJP, kitæ u Ernest Mawrie wa ya u Bernard Marak deiwa thoh leh da ka chithi wow dawa na ki wa toh u sangeh noh chi syndon wow klam kulmar neibah pyndooh burom ko ya ka Party.
U Lyngdoh da ong u wa nadooh wa sdang ka BJP da klam che ko wow pyrchah ya i baamtooh, tangwa ini i mih ini i pynbaad wa i wym sñiawthooh yumut hapyrdi ki MLA wa kitai ki 2 ngut kiwa yahkhmat ka Party, da che kdar wa u President da lai lait u ya kiwa mihkhmat neibhah wa da klam ki kat ya kani ka phang wa heh, tangwa ym em khut ki ya ka yalang yong ka Core Committee wow mynjur kawi ka rai yow lai yachem syndon ya u Montri Rangbah ha ka luti kawa toh deiwa khut yachem ka Co-Ordination Committee, heiwa da pynrap leh wa u Ernest da klam bait u du ha ki laad pathai khubor deiwa lai lait ya ki MLA wa kiwa yahkhmat rangbah ka Party.
Ha i jooh i por u Lyngdoh da kyrchaan u leh ya i klam yong u Dy. CM wa u CM wei kamjooh kamwa da kyrchaan da u AL Hek, wai da klam bakla da kitai ki bru wa thooh daw wei lada ym sñiaw biang ye ki wow mih noh na ka sorkar.
