Shillong: Ka dhab ki montri ka sorkar MDA da phah ko ya ka chnat pynroi sor ka jylla wow sylli ya ki thaw wa haap hapoh i pait ka Shillong Municipal Board lada yoobiang ko wow pynman ya ka Municipal election.
Hawa klam wa kiwa pathai khubor u Symbood Montri Rangbah, u Prestone Tynsong da ong u wa ka sorkar da klam yillu ko ya kani ka phang wa da wanrah da ka chnat Urban Affairs hadien wa ka Supreme Court da phah ko ya ka sorkar jylla wow pynman ya ka election Municipal ha ki san tylli ki Ward ha sor Shillong.
U Prestone da ong u wa kani ka phang man ko kawa kyrpang bha neibhah em i kynrum kynram wa ka sorkar ym kwah ko wow leh jhan wei da rai wow phah sylli wei takit bniah bha chwa ha waroh 27 tylli ki Ward wa haap hapoh ka SMB wei hadien wa yoh ya ka bui (report) ka sorkar daw chong pyrkhat biang ko chwa wow chim ya ka rai.
U Symbood Montri Rangbah da pyntip wa em 27 tylli ki Ward wei ha ka 17 Khonchonglad (Nov) 1998 da pynman ya ka election du ha ki san tylli ki Ward katwa ha ka 25 Khonchonglad (Nov) 2000 ka sorkar da thmu ko wow pynman biang ya ka election tangwa ymye u pynman ya ka neibhah da em du uwi wa wan thap pyrtuid uwa da ran noh hadien.
Discussion about this post