U montri ka chnat kaam rep u Banteidor Lyngdoh da ong u wa ki kari wa kit yaki mar rep kam ki jhoor hapoh ka jylla dang chah pynthut hi i lai i wan yong ki na kawi ka District cha kiwi heiwa da chah pynsangeh ki ha ki pulit wa ki bor pynlai District.
Kamtæ da ong u wa da phah ya waroh ki khlieh District kamjooh ki heh pulit wa ym toh wow pynthut yei lai i wan ki kari wa kit jhoor yow lai dai ha kiwon kiwon ki thaw ka jylla kamjooh cha kiwi ki jylla.
Ha iwi tawon i liang da ong u wa em boon ki yaw wa da wai kam ha Upper Shillong, Iew Mawlong, ha Lad Smit wa ha kiwi ki thaw ka jylla wei ki warep ym em chem chitom ki wow dai ya ki mar yong ki.
Da ong u ya ini hadien wa yachem wa ki seiñ ki warep yow yaklam yei eh i khoo wa maad ki na i por cha i por kamjooh leh da ong u wa ya uni u snem da pynbna kam u snem ki warep wei daw leh ya ki kattu katni ki kaam waka chnat tangwa wow lehkmen ha uni u snem ym ye wow leh neidaw wa em khlam COVID-19.
Da ong u lada lehkmen du hapyrdi 1000-2000 ngut ki warep ym em man ko kawa biang neibhah lada lehkmen toh u em 20,000 hadooh 30,000 ngut ki warep kamtæ da pynkut chwa ya ini wei daw leh da ki kattu katni ki kaam deilang waka chnat.
