U Montri Rangbah ka jylla, u Conrad Sangma da ong u wa ha kam kini ki por wym jooh em jia kamni wow joor slap ha waroh ka jylla heiwa da dooh leh ya boon tylli ki mynsien bru, da emkaam wow leh katwa ye yow pynduna yei dooh chooh chooh yei mynsien bru kamjooh wow leh yeiwa emkaam yow lait u jia ini i jooh.
Da pyntip u wa da phah ya ki bor District wow pait ki kiwon ki yung wa em hei maa nei oor khyndaw wei wow kyrriah ki cha ki thaw rieh namo ki Shelter wei lada ym em kini yow rah ya ki cha ki skur lane ki yung dorbar chnong.
Da khana u leh wa da em boon ki sarok kiwa da chah ktah iwa da ktah leh yei lai i wan ki kari cha kiwi ki jylla wei da lai paan yarap u naka Montri ka sorkar pyrdi, ka Nirmala Sitharaman yow yoh yarap poisa wei daw pyntip u leh ya ini cha u Montri Rangbahdooh ka ri, u Narendra Modi wa cha u Montri ki Kaam Pohyung, u Amit Shah.
Da pyntip u leh wa da phah pynlait smat ka poisa yarap cha kiwa hayung kiwa khlaad nei oor khyndaw wa kiwi de ki daw wa da wanrah u slap wa joor wei da yaleh katwa ye wow pkhooid ya ki sarok yow suk i lai i wan ki paidbah.
Chooh chooh da pyntip u wa ki Regional Committee da lai pait ki cha ki thaw wa da chah ktah kamjooh da phah yow paitbniah yei long i man ki thaw ki bhaw.
