U Montri ka sorkar pyrdi uwa pait ya ka chnat Road Transport and Highways, u Nitin Gadkari da ban joor u yei emkaam wow rai hadooh katwon kynta yah kari kamai kam ya ki Truck deiwa bood ya iwa sariem iwa da leh neibynta ki Pilot yow pynduna yei ngiah yow lait na iwon iwon i jia wa sñiawsih.
Ha ka yalang ka National Road Safety Council (NRSC) wa da pynman ynne ka sngi deilang wa kiwi de, u Montri da phah u ya ki sahep sorkar wow wanrah ki da ka Policy wow kynthup lang ya ka On-Board Sleep Detection Sensors ha ki kari kamai kawa daw ye u pait lada yoh thiah uwa yah kari kawa toh u man katkam ka kyrdan ka Europe.
U Montri da phah u leh ya ka Council wow yachem ko man ka ar bnai wei wow saam lang ya iwa da ye ki u leh. U Gadkari da ong u leh wa daw thoh cha ki Montri Rangbah wa cha ki DC yow pyntikna wa ka District Road Committee yachem ko man-i-por.
Ka NRSC wa dang thymme toh kawa sdang da ka Ministry ha ka 28-07-2021 wei ha kani ka yalang da chimbynta lang da waroh ki 13 ngut ki Non-Official Co-Opted Individual Members heiwa u Montri khynnah ka Road Transport and Highways, u General V K Singh leh da embynta lang u ha kani ka sngi heiwa waroh ki dkhot da e ki ya ki buit kammon wow pynbha pynchngaaiñ yei lai i wan ki kari.
