Jowai: Ynne ka sngi u MLA ka Jowai Constituency, u Wailadmiki Shylla da lai pait lai sylli u ya i ngam u sarok ha Umwakah (hapyrdi ka Loomkyrwiang, Chiliangraij, Chuwakhu wa ka Aitnar) ha Jowai iwa da jia ynnin ka sngi hadien u slap wa joor.
Ha ini i lai sylli u MLA da synraan lang leh u DC ka West Jaiñtia Hills, u Garod LNS Dykes, ki sahep na ka District, ka PWD, u President ka Seiñraij Jowai, u OR Challam, waheh chnong wa kiwi kiwi.
Hadien ini i sylli neiliang u MLA da phah u ya ka chnat PWD wow sylli bha ko yeini iwa jia wei da phah u leh ya ki sahep ka PWD wow puræ yillu ki yeini i bynta wei wow chna pynmiat ya uni u sarok da uwa paka yow khnang wow lait de u jia kam ini waroh neini chaphrang.
Heijooh i por neiliang u Wailad da phah u ya ki sahep ka chnat PWD wa ki bor District wow chna ki ya ka luti wa chipor (Temporary) kam heini i por chwa ka Behdieñkhlam khnang yow lait u thut hei lai i wan ki paidbah neibhah kani ka sarok em ko hajan ka Syiem Aitnar kamjooh leh wa ki chnong wow pyndep ya ka niam ka rukom.
Da pynrap u leh deiwa ong wa hanlada kani man ko ka kaam niam, tangwa emkaam wow burom salonsar ya i ngait ki bru khlem niaw chiliang iwi na iwi.
