U MDC ka Mynsngad Khanduli, u Dawan Lyngdoh uwa jop ha u snem 2019 naka UDP, ynne ka sngi hawa klam haka rynsan yalap Election paidbah yong ka UDP Jowai Circle wa pynman ha yung Building ka Seiñraij Complex ha Iawmusiang, Jowai da phla u yei daw wa du hapoh 6 bnai wa lai luti u kam u MDC hapoh JHADC da lai psiah noh u cha ka BJP wei hadien wym mankaam i thmu i angnood da kyruiñ dien biang u cha ka UDP wei kattæ da man u leh u kyrtong UDP wow yakhun haka Election MLA 2023 naka 1-Nartiang Constituency.
I daw wa mih u naka UDP du hapoh 6 bnai wa lai luti u kam u MDC hapoh JHADC ong u toh dei wym yohsa neibhah wa chem u hapoh District Council em sa du ki chyieñ donhi khlem pasoh heiwa wot tang ya ka tulop ki wakreh leh ym ye u su.
Heijooh i por ong u neidaw wa ki paidbah wa kyrchaan yong oo leh da sdang wan pynsñiaw ki yei emkaam khamtam wa da kyrchaan ki dei maya dei burom wot ha wym yoh u wow e chi tyngka leh.
Kamtæ dei yakut wa ki lok MDC, oo deilang wa ki 3 ngut kamjooh ka Party BJP wow yakrehlang khlem pynkheiñ sorkar, da psiah noh ki cha ka BJP dei angnood u chim i bahkhlieh neibynta u su tulop wei wow pynbiang yei emkaam ka Council, ym neibynta i myntoi samen.
Tangwa ong u ini i psiah BJP yong ki wym em poi ko cheiwon cheiwon wei sepai hi-eh neibhah hei lai luti da pynbaad u wa waroh kiwi won ki MDC da khang kdong wei da beh ki cha rood ya waroh 4 ngut kiwa psiah BJP.
Lyngba ini i jia man ko kam i sikai ya oo wym hoi u chaniah ha kiwi tangwa u yieñ da i hi yow kreh neibynta yong i hi.
Heiyatoh wa i lai luti yong oo neibynta ka Election MLA 2023 ha Nartiang Constituency, ong u boon kiwa klam beiñ neibhah wan u naka yung wa dooh, tangwa chim u yeitæ waroh kam i kyrkhu wei pynchlur chooh chooh ya oo u yakhun pyrchah yei eh.
“Neibynta kitu ki bru wa joh ong wa yoo wyrai ki nga, nga won ong O yaki sñiaw wyrai chwa ya idæ najrong i eh i jynjar wa maad phi hei lai luti kam ki paidbah, wei lada tip phi u sñiaw wyrai ya idæ daw kynmoo phi yei hok wei wow jied yei sakhiat,” ong u Dawan Lyngdoh.
