Heiyatoh wa i chah tynyap ki arngut ki kynthai hapoh yung wa sah ki ha Nongstoin kitæ ka Philisis Syiem (79 snem) waka Maitlynti L Marshillong (25 snem) kawa man kam ka wakreh. Ki pulit ka West Khasi Hills da pyntip ki wa da yoh ki wow kem ya uwi u bru uwa da phla wa leh ya ini i kaam iwa da jia ha i miet ka 23 tarik uni u bnai.
U SP ka West Khasi Hills District u Herbert G Lyngdoh da pyntip u wa uni u bru toh uwa tip pyrtuid kam u Banphrangkupar Nongbri uwa dang 24 snem i rta wei toh uwa na ka chnong Nongstoin hi.
Da pyntip u wa ha ka takit yong ki pulit da tip ki wa em uwa wan cha ini i yung ha ka miet ka 23 tarik heipor kamwa 10:30.
Kamtæ da sdang wow thooh ya uni u bru wei ha ka sngi ka 25 tarik da yoh wow kem ya oo napoh kawi ka kari ha Mairang wei hawa takit ya oo wei hadien wa pynyoo ya oo ya ki sabut, da phla noh u wei da yah u leh chei thaw wa murieh u ya ar tylli ki Mobile Phone yong ki arngut kiwa tynyap u wei da yoh leh ya ka poisa wa tooh u na ka yung kiwa tynyap u kawa T. 64,500, ki sula wa ki juti wa pynemkaam u.
Hadien wa leh u ya ini i kaam, uni u bru da yut u cha Shillong cha i yungwai wa sah u ha Nongrim Hills heiwa heini da chem ya i juti wa em snam. Wei ya kini waroh da kem wei da phah cha ka FSL yow leh yeiwa emkaam.
Hadooh kattæ ki pulit da ong ki wa uni u bru da leh u ya ini i kaam samen wei da yoh leh wow kem ya ki tiar wa pynemkaam u yow leh ya ini i kaam kam ki tari, ki nar, ki dieñ hanla kattæ leh ka takit dang lai ko chakhmat lada dang em chooh kiyi kiyi.
Uni u bru chwa wow lai u cha ini i yung da phone chwa u wei neidaw wa toh uwa tipmit kamtæ da wai dwar ya oo wei i thmu hi u toh wow lute ka kani ka yung.
