Hadien wa da pyndep ya ka yachem wa khaddooh hapyrdi ki CEM ka KHADC, JHADC wa GHADC waka sorkar jylla hajrong wow pynkylla ya ka Sixth Schedule katkam wa da tyrwa da ka Parliamentary Standing Committee. Kamtæ neiliang ka sorkar jylla wa ki District Council da chim ki ya ka rai wa khaddooh yow phah cha ka Committee.
Neiliang u Montri Rangbah ka jylla, u Conrad Sangma da pyntip u wa ki rai wa da chim toh hajrong ki Unrepresented Tribe namo ki jaitbru wym yoh ya kiwa mihkhmat yow man kam ki MDC deiwa thung ya ki kam ki Nominated MDC. Hajrong ini neiliang ka sorkar wa ki District Council da ong ki wa da tyrwa ki wa toh u pyndam noh ya i kyntien Unrepresented Tribe.
Hajrong wow pynboon noh ya ki MDC, da chim ya ka rai wa ym toh u em palat 40 ngut ki MDC ha kawi pa kawi ka District Council wei ym toh wow em palat 4 ngut (2 ngut ki kynthai) kam ki Nominated MDC iwa mut deilang waroh toh u em 40 ngut donhi ki MDC. Tangwa lada em kiwa kwah u neh kamjooh, ye ki wow em 29 ngut ki MDC wow jied da ki paidbah wa uwi kam u Nominated MDC lane palat ya 30 ngut tangwa ym toh u tam ya ka 40 ngut.
Heiyatoh wa ka Village Council, u Conrad da ong u wa kam ha Ri-loom Garo kiwa em ya ki Nokma kiwa pait heiyatoh wa ki thaw ki bhaw, ka dustur riti wa kiwi de ki kaam. Kini u pteiñ ki kamwa jooh hi deiwa pait lang ka District Council. Tangwa yow pyntikna waka poisa yarap naka Finance Commission u poi ko, emkaam wow em ka Election kamtæ daw pynman ya ka Village Council Election tangwa ka Village Council ym emkti ko hawa yatoh wa ka dustur riti, ki thaw ki bhaw kiwa daw neh hi wa ki Nokma wa ka District Council.
Ya ini i jooh hawa yatoh wa ka Ri-loom Khasi waka Ri-loom Jaiñtia, ki Dorbar Chnong (Village Dorbar) u pteiñ hi ki wei ym man ki kam ki Village Council lane ki Panchayati Raj wei daw pynman hi leh ya ki Election katkam ka Para 2(a) manda pynkylla ya ka Sixth Schedule heiwa da e bor ya ki District Council wow pynman ya kini ki Election. Katwa ki Dolloi, ki Syiem wa kiwi kiwa da em nadooh warim u neh ki kamjooh deilang wa ki kaam wa da pynkit ha ki.
Hawa yatoh won wa ki Municipal Council, da rai wow pteiñ hi wow em ki hapoh ka jylla deiwa khlem booh yei pyrtuid yong ki hapoh ka Sixth Schedule deiwa pynbait ki Municipal Board, ki Town Committee wa ki District Council kammon wow ya krehlang ki.
