Shillong: U MDC ka Rambrai-Jyrngam, u Bajop Pyngrope da pyntip u hapoh ka yung dorbar KHADC wa neiliang ka sorkar Assam da tyrwa ko da ka poisa cha kiwa chong chnong yong ki 33 tylli ki chnong ha khappood waka Assam neibynta wow yoh chna yaka Kulsi Dam ha Wahkhri.
Chwa ini neiliang u MDC da wanrah u yei kylli hajrong i long i man yong itai i thmu wow chna yaka Dam kawa toh ka Project yong ka sorkar pyrdi ha i thaw wa em i kajia hapyrdi ki bynta ka West Khasi Hills wa Ri-Bhoi District yong ka Meghalaya waka Kamrup District ka Assam.
Hawa jubab yei kylli, u Titosstarwell Chyne uwa man leh u CEM ka KHADC da pyntip u wa ini i kaam em ko hei pait yong ka sorkar jylla kawa da thung yaka Committee wow bichaar hapoh i yahkhmat yong u Chief Secreatary ka jylla kam u Chairman wa ki dkhot 15 ngut wa kynthup yaki Commissioner Secretary, ki DC yong ka West Khasi Hills wa Ri-Bhoi District wa u Secretary ka KHADC.
U CEM da pyntip u wa hapoh ka yung wa haka 17 tarik u Kmaichonglad 2019 kani ka Committee da lai sylli ko ya i thaw wa da thmu wow chna ya katai ka Dam, tangwa iwa sñiawsih toh wa khlem pyntip cha ki bor chnong. Chooh chooh da ong wa neiliang ka KHADC ym pu ye wow kular iyi iyi hajrong ini i kaam neibhah wa daw yang chwa yaka Report yong ka Committee wa da thung daka sorkar.
Hawa yaklam wa u Bajop, da pynsñiaw yei sñiawsih wa khlem kynthup ha ka Committee ya kiwa mihkhmat næ kiwa pynlai chnong kiwa tip bha ya katai ka thaw. Da pyntip u wa kiwa chong chnong da pyntip ki cha oo wa da chah thong hadooh T.5-6 Lak kawi kawi ka manyung wow kyrchaan ya itai i thmu yong ka Assam wow chna yaka Dam.
Da pyntip u leh wa neiliang ka Assam da lai phon ko leh ya oo wow kyrchaan ya ini i thmu hapoh ka KHADC, deiwa ong wa lada kani ka Dam u mankam ko, daw wanrah yei dooh nong yaka thaaiñ wow yoh yaka sarok Nongstoin-Rambrai-Kyrshai-Chaigaon ya kawa ka NHIDCL da thmu ko wow khut noh yaka Tender.
