Phone u Pynïaid wut-wut cha u CEM ka KAAC hadien wa yoh ujor wa em 5 tylli ki khyrdop wa khrong dan

I khrong dan yong ka Karbi Anglong Autonomous Council (KAAC) da nang pteiñ hi i hadooh katni ha ka thaaiñ Block II, iwa da pynman ya ka Synjuk ki Rangbah Shnong Border Area Raid Nongtung kawa kynthup ya 22 tylli ki chnong ynne ka sngi wow lai pyntip cha u Chief Executive Member ka KHADC, u Pynïaid Sing Syiem uwa da klam wut-wut lyngba ka Phone ya u CEM ka KAAC yow tuklar.

Katkam i khana ka synjuk, da em san tylli ki khyrdop khrong dan yong ka chnat khloo ka KAAC ha katai ka thaaiñ, kitæ ha Jatalong, Sabuda, Umjaknieh (Jatalong), Mawsladieng wa Umsohphoh, Madan Umwang wei kini ki khyrdop da chim dan ki leh ya ki mar rep man-ka-sngi.

Ha ini i lai yachem, kiwa yahkhmat ka synjuk, da synraan lang da u Charles Marngar, MDC wa u MLA ka Congress na Mawhati wa u Ronnie V Lyngdoh, MDC wa MLA ka Mylliem.

U President ka Synjuk, u Blikstar Sohtun da ong u wa kiwa chong chnong da maad ki yei eh neidaw wa boon kini ki khyrdop khrong dan. Da ong u wa hei yong sakhiat, ka KAAC da booh ko ya ki Forest Check Gate yow khanglaad yei chah tooh ki mar khloo, tangwa da poi pathan cha ki bynta wow khrong dan ya ki mar rep.

Related posts

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Pdiang ka sorkar yei pynche u Sniawbhalang, ki wym hun ye ki wow lai tih chooh: Prestone

May 21, 2025

Da ong u wa nadooh wa ka EC wa thymme hapoh i yahkhmat u Pynïaid da lai hiar ki cha katai ka thaaiñ da em i ya krehlang wa ka Karbi Anglong Autonomous Council, wei nadooh katai ka sngi ym em de i pynthut yow pynkreh ya ki Scheme, tangwa iwa sñiawkhia katni won toh yei chong chngaaiñ ya waroh kiwa chong chnong neibhah ki khyrdop khrong dan jooh pyndik ki leh ya kiwa chong chnong.

Neiliang u Charles Marngar da e khublei u ya u CEM, yow pynsñiaw u yei kmen wa u CEM da kular u wow chimkhia hawa yatoh wa kitai ki khyrdop, neibhah chim dan ki na ki dieñ yap wei na u chyiap yow chna yung. Da ong u wa kam u MLA da klam u ya kani ka phang chah khrong dan ha ka Yung Dorbar Chna Aiñ tangwa ym sñiawthooh sñiawthaw de yei juba yong u Montri Rangbah neibhah wa ha katai ka sngi da em won sa i klam pathan chaphang ki kaam pood wei da ya sai pathan da ka Map.

Ha iwi won i liang u Charles da pynsñiaw u wa ki 22 tylli ki chnong kiwa em ha Block II man ki kawi wei kiwa yatylli hawa yatoh wa i pynbait ya u pood u ang yong ki ar jylla.

Hajrong ini i pynsñiaw yong ka Synjuk ki Rangbah Shnong, u Chief Executive Member, u Pynïaid Sing Syiem da ong u wa ki khyrdop khrong dan ka KAAC toh kiwa da slem wei da dep yaklam wa u CEM ka KAAC, u Dr. Tuliram Ronghang, heiwa da klam che u wa wa ya ki mar rep ym toh wow khrong dan.