Jowai: Ka Kiri Daloi Traditional Instrumental Music Festival wa arsngi wa da pynman ha chnong Shangpung, West Jaiñtia Hills District dapoi ko chawa kut ynne ka sngi.
Ha kani ka sngi da em i pynyoo rong yei sap tem sap put tynre kamjooh i rwai, wa da tip kam ka Kiri Doloi Traditional Instrumental Music Festival wa pynman da ka Sangeet Natak Akademi chirup i krehlang ka Madhav Sanskriti Nyas, Guwahati ha chong Shangpung West Jaiñtia Hills District dapoi ko chawa kut ynne ka 22 tarik hadien arsngi i pynman ya ka ha madan Pohlangdoh Shangpung hajrong ka phang “Our Traditional Musical Instruments, Our Identity” heiwa da pynlut pynsep yaka da ka National Academy of Music, Dance and Drama, New Delhi, Ministry of Culture ka sorkar India.
I pynman ya kani ka tamasa ha kani ka chnong toh chibynta kam ka dak u pynsah naam sah burom ya uwi na ki Khlawait ka Ri u Woh Kiri Dhar, u Daloi iong ka Elaka Shangpung uwa da yakhun pyrchah neibor synchaar ki pharæng ha ri-loom Jaiñta.
Ya u Kiri Dkhar da kha ha u snem 1823 ha chnong Shangpung, da man u kam u Dolloi ka Elaka Shangpung kamwa 10 snem wei da yap u ha madan thma, Loommukut Shangpung heipor wa yaleh pyrchah u ya ki pharæng ha ka 05-02-1862.
Ha kini ki arsngi yong i ya pynyoo rong yei tem i rwai tynre da wan chim bynta hadooh kamwa 20 tylli ki dhab na ki chnong ki thaw waphær waphær ka jylla.
Da sakhi leh wa haka sngi pynkut da em kamwa 7 tylli ki dhab wa chim bynta wa kynthup ki ya kiwa na Pynther, na Mawphlaw na Wahkhen wa haap hapoh East khasi Hills, ar tylli ki na West Garo Hills ka Wangala waka Nonipara, kawi na West Khasi ka Mairang wa ka Unity of Meghalaya.
Da emlang ha kani ka sngi u Ullas Kurkarni General Secretary Rashtriya Swamsevak Sangh of North East Region, u Amirchand uwa man kam u All India Joint Organising secretary, Raju Das Director Sangeet Natak Akademi of North East Region, u Parag Agarwal Trustee Madhav Sanskriti Nyas, u Acting Dolloi ka Elaka shangpung u Chanky Langbang, u Dolloi Elaka Jowai Puramon Kynjing, u Heibormi Sungoh Co-ordinator Kiri Dolloi Traditional Instrumental Music Festival wa kiwi natlor ki khynnah skur.
Discussion about this post