15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Phooh pheiñ ka lehkmen sngi laitlooid ha chnong Jowai

0 Comments
Advertisement ad1
Advertisement ad1

Jowai: Ka lehkmen sngi laitlooid ka ri India namo ka 73rd Independence Day da pynman yaka leh ha chnong Jowai ha madan Jrisaleiñ Chutwakhu, Jowai. 

U montri ka chnat Fisheries u Comingone Ymbon da pynhær u yaka lama ka ri wei da chim u leh yaka Rashtriya Salute ya ki 33 tylli ki dhab wa kynthup yaka District Police Force, Home Guard, Thomas Jones NCC, Government Girls NCC, Meghalaya Bharat Scouts, Jowai, Meghalaya Bharat Guides, Jowai wa 26 tylli ki skur kawa yahkhmat da u Parade Commander DSP Donkupar Moksha, MPS, waka 2nd in Command ka SI Ibashisha Kharpran.  

U kongsan ha kani ka sngi u Comingone Ymbon hei klam yong oo da pynkynmoo u ya ki paidbah ya kiwa yahkhmat kiwa da e lut waroh i jait yow yoh yei laitlooid wei da klam u chaphang ki kaam pynroi wa ka sorkar da wanrah ko hapoh ka jylla. Da kyrpaad u leh ya waroh wow ya krehlang yow wanrah yaka chongsuk chongsaiñ kamjooh yaka roi ka paar hapoh ka District waka jylla waroh kawi.

U montri da saam u leh yaka khusnaam cha kiwa jop haka March Past kawa yoh nyngkong daka Khimumsniang Secondary School, wa ar ka Thomas Jones Synod College wa le ka Seinraij Higher Secondary School.

Da saam khusnam leh cha kiwa chimbynta ha ki pynyoo rong yaka dustur riti heiwa da yoh nyngkong da ka Dulong Secondary School, wa ar ka Thomas Jones Synod College wa leh daka Biate Cultural Organisation, Jowai.

Neiliang ka Officer Club, West Jaintia Hills District da pynkup burom wei da e yarap poisa ki T. 67,000 ya u Khamphereiei Pala yow lai puræ u yaka MBBS hadien wa yoh u yaka kyrdan 8th Position haka HSSLC Exam (Science) 2019 uwa naka skur North Liberty Higher Secondary School, Jowai. Da lait u leh yaka NEET Exam wei dang yang u ya i thaw wow lai puræ MBBS.

Ha kani ka sngi da pynman leh yaka yakhun Final ka Independence Cup hapyrdi ka Chilliangraij Jowai waka Catholic Youth Mihmyntdu ha Kiang Nangbah Stadium Ladthadlaboh.

Kam chibynta ka lehkmen sngi laitlooid wei wow pynsñiawthooh paidbah ya i emkaam u man kiwa syndong hawa yah kari, ka West Jaiñtia Hills District Executive Force waka District Legal Service Authority West Jaintia Hills deilang waka Royal Enfield Riders ka Meghalaya Police da pynman ki yaka Freedom Ride hajrong ka phang “Obey Traffic Rules- Ride with Care, Life has no Spare.” Kawa da kaweh lama da u District Session Judge u E. Kharumnuid kawa sdang nadooh Jowai Police Station, wei da lai luti chadooh Phramer, Jowai Bypass hadooh Mowkyndur Forest Check Gate wei da dong biang cha Jowai wei da pynkut ha Jowai Police Reserve. 

Yaka Independence Day da lehkmen leh ha Hima Shangpung ha Hula Playground Moosyiem, Shangpung. Heiwa u MLA ka Sohra u Gavin Mylliem da pynhær u yaka lama ka ri wei da chim u leh yaka Rashtriya Salute yong ki 24 tylli ki dhab wa yahkhmat da u Parade Commander u Shidor S Passah.

Da em leh ki yalehke Drill, ki rwai ya ki sur maya ri, ki chaad wa da chimbynta da ki khynnah skur.

Share this:
Previous

Hadien wa klam u MP hapoh Parliament ya ki rwai ka chnong Kongthong, wan sakhi u ya ini

Next

Wan pynhær u Hamlet Dohling yaka lama ka ri ha Khliehriat