Kani man ko ka samoi wow hiar rep ki khon ka Niamtre cha ki pynthor ki phiang wei ynnin ka sngi kamwa jooh yah da kiwa rim nachwa, ki khon ka Seiñ Raij Mihmyntdu da pyndep chwa ki ya ka Chaad Sukra ha Madan Wahryiong, Mihmyntdu.
Chwa wow yoh ya ki chaad na ki dong ka Mihmyntdu da em ka yalang heiwa u MLA ka Jowai, u Wailadmiki Shylla da man u kam u kongsan hei emlang u Dolloi ka Jowai, u Puramon Kynjing wa kiwi kiwi.
Ya ka yalang da pynlai da u B. Ryngkhlem heiwa da yoh leh ya ki klam na ki waheh wasian yong ki dong ki chnat wa em hapoh ka chnong Mihmyntdu.
U Wailadmiki Shylla kam u kongsan hawa e yei klam da e u i yaroh ya ki khon ka chnong Mihmyntdu kiwa da pynkhreh bha wow pynphooh ya kani ka Chaad Sukra yong ki khamtam da ki riam tynre.
Da ban joor u leh yei emkaam wow yada ya ki khloo kamwa yah ka riti dustur na kiwa rim nachwa wow yada ya ka rymaw neibhah yeini waroh ye u ong wa dang ini kyrngiat ka pyrthai deiwa pynman ya ka World Environment Day.
Chwa wow kut ka yalang, da yoh ya ki kyntien khublei na u Wandar Phawa.