Ka kari wow pynkhooid ya ki luti rel namo ka Self-propelled Railway Track Scavenging Vehicle daw ye noh ko u man salan noh ya ki bru kiwa pynkhooid jhep wa jakhlia ha ki luti rel.
Hanla da khang wow pynkhooid jhep da ki bru (Manual Scavenging) nadooh u snem 1993 hapoh ka ri, tangwa hadooh kini ki sngi dang pynemkaam da ki bru hi wow pynkhooid ya ki jhep ki jakhlia (Excreta) haki luti rel deiwa pynemkaam da ki saroo wa ki korni wei hanla dep ki u pynkhooid tangwa neh bait kattu katni i jhep ha ki luti.
U Dr. Sharad K. Pradhan, Associate Professor, Department of Mechanical Engineering, National Institute of Technical Teachers’ Training and Research (NITTTR), Bhopal, da chna pynwandur u ya ka Multifunctional Railway Track Scavenging Vehicle dei kyrchaan ka Advanced Manufacturing Technologies Programme yong ka Department of Science & Technology (DST), ka sorkar pyrdi.
Kani ka kari ye ko u lai ha ki sarok kamjooh hajrong ki luti rel wei da pyndait ha ka da ki tiar kam ka Dry and Wet Suction System, Air and Water Spraying Nozzles, Control System wa kiwi kiwi wow pynsuk u pynemkaam ya ka. Uwi u bru ye u wow pynkrehkaam ya kani ka kari chirup wa uwi uwa yah wow pynkhooid ya ka luti rel.
Hadien wa dadep riñ ya i jhep i jakhlia (Dry and Wet Suction), ka kari u siat um (Spraying Water Jet) wow pynkhooid ya i jakhlia iwa sah ha ki luti rel. Neitæ won siat dawai tynyap khñiang (Disinfectant) won ko ha ki luti wow beh ya ki phare, ki khne wa kiwi ki khñiang. Ini i siat pynkhooid da leh ya i poh ki naar ha ki luti rel wei i jhep wa i jakhlia iwa raw wa iwa um (Dry and Wet Garbage) da pynlang won ya ki ha jar jiar ki top wow noh won ya ki.
Ha ka kari da pyndait leh ya u Joystick-controlled Telescoping Suction Pipe wow ye wow pynkhooid ya ki luti rel.
Ya kani ka kari dang sylli (Pilot Testing) ya ka wei hadien ini daw ye u chna won ya kini ki kari.