U MLA ka 2-Jowai Constituency, u Wailadmiki Shylla hawa wan sakhi yaka Chaad Sukra ka Seiñraij Mihmyntdu ynne ka sngi, pynsñiaw u i kmen wow yoo waka Chaad Sukra yong ki khon ka Ñiamtre da nangphooh nangphieñ ko kat nanglai ki snem, wei kyntu haroh u wymtoh u kynmoo ñiam du heipor Chaad Sukra næ i por Behdieñkhlam tangwa toh u kynmoo lynter.
Ong haroh u wa hawa em ha kawon kawon ka ñiam emkaam u thooh bniah u tip yaka khnang yow tip yei yumut iwon iwon iwa leh, deiwa pynrap leh wa ha kini ki sngi boon ki khynroo khyllood yong ka Ñiamtre leh wymtip ki tang yei mut i Chaad Sukra.
Heiyatoh waka Ñiamtre sñiawkmen u wa em ki seiñ waphær waphær hapoh yong ka kiwa da yaleh u e yei sikai ñiam yow tip yaka ñiam ka rukom ka riti dustur.
Ha kani ka sngi neiliang u Wailadmiki Shylla da kular u leh wow e yarap T. 3 lak cha ka Seiñraij Mihmyntdu neibynta iwon iwon i emkaam yong ki.
Neiliang u Waheh Chnong, u Abul Phawa won hawa klam da sñiawngooh u ya u MLA wa hei lailuti yong oo da yarap wanrah u chiboon i roi i paar hapoh ka chnong nadooh ka luti syngkieñ, ka umbaam umdih wot i yarap yong samen cha kiwa emkaam.
Kamtæ kyntu u yaki paidbah wow pteiñ chooh ki i yakrehlang neibynta kiwi won ki myntoi neini chakhmat.
Da emlang ha kani ka sngi u Helping Phawa uwa da mihkhmat naka Seiñraij Tuber, ki waheh wa sian naki chnong wapher wapher wa kiwi.
Kiwa chaad kiwa da wan wow chimbynta toh na kiwa boon ki dong ka chnong ka Mihmyntdu nadooh ki khynroo khyllood, ki khynnah wa ki manbei.
