Piah ka Congress arliang ha Jaiñtia Hills

Jowai : Ki 17 ngut ki MDC ka Congress ha JHADC da yapiah ki arliang hapoh i yahkhmat u Chief Executive Member wa hapoh i yahkhmat u ma MB Rymbai uwa man leh u CEM warim ka JHADC ryngkat wa u ma Andrew Shullai uwa man leh u Dy. CEM ka JHADC

Ka Dorbar Mang Tyngka wow sdang mystep ka 22 tarik ye ko u yo yeini i awri awra.

Hawa yaklam wa kiwa thohkhubor, u ma Joinriwel Pyrtuh, Member In Charge ka tnat Kata Tanka, da ong u wa ka EC u ma Thombor Shiwat dang khlan bha ko neibhah em ko hadooh 17 ngut ki MDC kiwa kyrchaan ya oo. Da kam u leh wa kitai ki 17 ngut naki 5 ngut man ki ki MDC kiwa da jop na ka UDP weiwa 3 ngut won kiwa da jop kam ki Independent ryngkat wa ki 9 ngut ki MDC Congress.

Katwa 8 ngut ki MDC won da yut noh ki cha ka liang u ma MB Rymbai kiwa kynthup ya u ma Andrew Shullai, u ma Hoppingstone Bareh uwa man kam u Dy. Chairman, u ma Laitsing Shylla uwa man kam u Chairman ka JHADC, u ma Winning Sungoh (Mowkaiaw MDC), u ma Wison Iano (Raliang MDC), u ma Hermon Phawa (Wahiajer MDC) wa u ma Ruda-o Tang uwa man kam u MDC ka Shilliang Myntang. Kini da kam ki leh wa da yoh ki yei kyrchaan yong ki UDP kiwa kynthup ya u ma Chanky Lyngdoh, ma Richard Sing Lyngdoh wa ar ngut ki Independent u ma Rio Sten wa u ma Shkem Suchiang.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Ka liang u ma MB Rymbai wa u ma Andrew Shullai da kam ki wa waroh ki MDC ka UDP da kyrchaan ki ya ki.

Katkam ka khubor, i yakhih wow pynhiar chuki ya u ma Thombor Shiwat da sdang nadooh uni u bnai wa dadep heiwa da em hadooh 21 ngut ki MDC kiwa da soi pyrtuid wow kyrchaan pura ya u CEM ka JHADC weiwow wym elad wow pynhiar ya ka chuki yong oo.

I awri awra dang kyrooh i hadien wa da em hadooh kamwa 8 ngut ki MDC kiwa da soi yaka jooh ka soskular wow kyrchaan pura ya ka liang u ma MB Rymbai. Ka khubor wa tikna da ong wa kitai ki 21 ngut da soi ki ya ka soskular wow kyrchaan pura ya u ma Thombor Shiwat da man ko ha ka 26 tarik u Thohkhmi (February).

Chooh chooh da ong wa ya ka Dorbar Mang Tanka da thmu wow pynman nadooh ka 22 tarik hadooh 27 tarik ryngkat wa ki chuti Holi wa Good Friday hapyrdi ka sngi Chohthat wa ka sngi Bibar, tangwa syndet da pynkylla ya ki sngi chong dorbar du 2 sngi itæ ha ka 22 wa 23 tarik.

Hawa pyrchang u phone cha ki dkhot ka UDP, uwi na ki MDC da pyntip u wa em u ha yung wei ymtip u yeitæ tangwa da ya phone hieh ki mar kylliang.

Katkam ka khubor wada yoh na ki kattu katni ki MDC ki wym kwah u mih pyrtuid, da ong wa U Deputy Chairman ye u u pyndam chipor yei man dkhot ki kattu katni na ka yung dorbar JHADC.

“U Deputy Chairman uwa da biang i kyrdan puræ, da puræ bha u yeiwa jia ha waroh ki Dorbar la ha JHADC, ha ka Jylla mo ha Parliament, khamtam ya ki kyndon pyllai dorbar ka JHADC, ye u wow pyndam chipor yei man dkhot ha ka yung dorbar”, da ong uwi na ki MDC.

“Da yoh i ya ki sabut lyngba ki phone call recording wa kitu ki MDC kiwa da paan wow chim poisa na ki ar liang ye ki u chah pyndam (sospon)”, da ong utai u MDC.