Ka East Jaiñtia Hills District Basketball Association, Khliehriat da pynman ko ya ka 3rd Open Basketball Tournament 2021 kawa da poi cha wakut haka 12 tarik uni u bnai ha Basketball Court yong ka Jaintia Eastern College, Khliehriat.
Ha katai ka sngi u kongsan toh u Thynda Sana uwa man u Working President ka Khliehriat Block Congress Committee (KBCC) katwa u symbood kongsan toh u Chrispin N Dkhar uwa man u President yong ka Khliehriat Assembly Youth Congress (KAYC) wei da pynlai yaka yalang da u Deibormi Syad, President ka East Jaintia Hills District Basketball Association, Khliehriat.
U kongsan hawa e yei klam da e khublei u ya ka Association wa da ye ko wow pynman ya kam kani ka yalehke man-u-snem deiwa kyntu leh ya kiwa yalehke waroh wow man ki kiwa ryntih, kiwa em leh yei mynsien ya krehlang wei wow chimkhia leh ya ki kaam yalehke kiwa yarap bha chiboon wow yoh yei chait i khiah.
Hawa kyruiñ cha ka yalehke ki chynrang, da rah daka DLM, Dkhiah East deiwa jop yaka Old Skool Baller da 34-32. Ha kani ka sngi leh da em ka yalehke Final yong ki kynthai hapyrdi ka Jowai Team waka Dkhiah East Team heiwa ka Jowai Team da jop ko da 28-06.
Yaki Trophy da saam cha kiwa jop da u kongsan wa u symbood kongsan deiwa ya emlang ha kani ka sngi ka Delightful Lamare, General Secretary ka EJHDBA, u Gerald Phawa, u Benjamin Darnei wa kiwi kiwi.
