Ka dongmusa yong ka lympung yalehke 5th Meghalaya Games wa da pynkop diñ da u Montri ka chnat Sports and Youth Affairs ka sorkar jylla, u Shakliar Warjri haka 9 tarik uni u bnai ha Shillong, ynne ka sngi da wan poi ko ha West Jaiñtia Hills District heiwa ki khynroo khyllood wa yalehke namo ki Athletes ka District kiwa daw lai mihkhmat ha katai ka lympung nadooh ka 15 hadooh 20 tarik uni u bnai da ya chimbynta ki u rah ya kani ka dongmusa nadooh na Ummulong wei da pynpoi ha Jowai lyngba ka Jowai Bypass neitæ na Laad College ter ter u surok hadooh wa poi ha Iawmusiang, Jowai deilang i kyriaw.
Ha Iawmusiang Jowai da em ka yalang tbian neibynta u pyn-eh-daw yaki khynroo khyllood ka District hei emlang u MLA ka Jowai, u Wailadmiki Shylla kam u kongsan, u DC ka West Jaiñtia Hills, u B.S. Sohliya, u SP ka West Jaiñtia Hills, u C. Syrti, ki sahep ka chnat District Sports na West Khasi Hills, na East Jaiñtia Hills, na West Jaiñtia Hills wa kiwi.
U Wailadmiki Shylla hawa klam kam u kongsan ong u, kani ka dongmusa man haroh ko kam ka dak u pynrhem hapoh i mynsien wei i poi yong ka ha kani ka thaw daw yarap ko u pynsñiawthooh haki paidbah wa chong chnong yei emkaam ka yalehke Sports ha kini ki sngi, neibhah wym toh de ka kaam yalehke yow yoh du yei chait i khiah tangwa man haroh ko ka laad kamai ja-kpoh.
Kyntu haroh u yaki khon khynroo khyllood wow chimkhia ki ha kam kini ki lympung wei u pteiñ lynter yei rukom pynkhreh ya idæ wym toh u yang du manda jan i por yalehke.
Neitæ da pynkynmoo haroh u wa i lai chimbynta yong ki haka Meghalaya Games wym toh du neibynta samen tangwa mihkhmat ki neibynta ka District waroh kawi.
Hawa kyruiñ u cha ka lympung kawa daw sdang haka 15 tarik uni u bnai, kyntu u ya kiwa daw lai chimbynta wa manda poi ki cha katai ka lympung wym toh u pait ki du yei duna, neibhah kani toh i pyrchang wa ka sorkar kamjooh ki sahep waphær waphær kiwa da yaleh katwa ye u chimkhia neibynta u pynku yei kaam Sports deiwa pynman ya kani ka Meghalaya Games.
Kamtæ lyngba kam kani yooluti u wa kat nang lai ki por daw nang ye u pynpliah pynbha chooh chooh ha ki bynta waphær waphær.
Hadien ka yalang, u Wailadmiki Shylla da e kti u yaka dongmusa ha u Beningstar Lyngkhoi, u International Athlete ka jylla yow rah u ya kani ka dongmusa Meghalaya Games cha Tura.
Discussion about this post