June 20, 2019
Advertisement
Advertisement
Khliehriat: Ka Inter School Subroto Mukherjee Cup Football Tournament ha East Jaiñtia Hills District, kawa pynmaan da ka yung krehkaam u District Sports Officer da poi ko chawa kut ynne ka sngi heiwa ka District Medical Health Officer, East Jaiñtia Hills ka Dr. J. Lakiang da man ko kam ka kongsan hei emlaang u DSO ka District, u K. Passah ka Child Development Project Officer ka R. Passah wa kiwi kiwi.
Ha kani ka lympung kawa chi tayaw da wan chimbynta da 55 tylli ki skur ka District heiwa 22 skkur da yaleh ki ha ka Under- 14 Boys, 22 skur ha ka Under-17 Boys wa 12 skur ha ka Under-17 Girls.
Ka Dr. J. Lakiang hei klam da da ekhublei ko ya waroh ki skur wa da chimbynta, kiwa jop wa kiwa da pynman ya kani ka lympung kawa jop deiwa kyntu leh wa ka kaam yalehke daw yarap ko chiboon ya ka District.
U K. Passah da e khublei u ya ki wakreh yong ki chnat waphær waphær kamjooh ki Sports Associations kiwa da emkti wow pynman ya District Level Subroto Mukherjee Cup kawa jop. Da pyntip u leh wa ya kiwa jop daw mihkhmat ki ya ka District ha ka State Level Subroto Mukherjee Cup wei daw em leh ka Coaching Camp neibynta kini kiwa da chah jied.
Ha ka Under 14 Boys ka Musniang Secondary School da jop ko ya ka Rymbai Government Secondary School da 1-0 ya kawa da thap da u Dei-I-ormi Rymbai, katwa ha ka Under-17 Girls ka Khliehriat Higher Secondary School da jop ko ya ka Rymbai Government Secondary School da 1-0 lyngba ka kool na ka Marsanki Kya katwa ha ka Under-17 Boys won ka Chiehruphi Secondary School da jop ko ya ka Musniang Secondary School da 2-0 lyngba ki kool na u Hamekmen Lamare wa u Suting Syrti.
