Ka Integrated Health Campaign kawa la 3 bnai wa da pynman da ka Meghalaya Aids Control Society (MACS) deiwa ya krehlang wa ki bor District ka East Jaiñtia Hills deilang waka yung krehkaam u District Medical & Health Officer wa kiwi de ki chnat sorkar, dapoi ko cha wakut ynne ka sngi deiwa pynman ya ka yalang pynhaap pyrda kawa da pynman ha pchem ka yung krehkaam u DC ha Khliehriat.
Kani ka Health Camp da e pyrtuid Mission HOPE (HIV Outreach & Prevention Engagement) yow lai thooh leh ya kiwa chah ktah ha u khñiang HIV.
Da ya emlang ha kani ka sngi da u Kyrmen Shylla, Montri ka chnat Revenue and Disaster Management kam u kongsan deiwa emlang u Mayralborn Syiem, MLA uwa man leh kam u Chairman ka Meghalaya State Health Advisory Board ka sorkar Meghalaya, u Gautam Warjri, MCS, Addl. Deputy Commissioner, East Jaiñtia Hills District, u Dr. Dominic Shylla, District Medical & Health Officer, Dr. B. Decruse, Project Director ka MACS wa u Dr. L. Myrthong, Deputy Director (Medical) MACH wa kiwi kiwi de.
U Kyrmen Shylla hawa e yei klam da ong u wa kani ka Integrated Health Campaign pynyoo ko yei myntoi manda ya krehlang neibhah ha ka pyrthai katni ki kaam wa yatoh wa i chait i khiah toh kawa em dur boon jait wei yow man iwa jop emkaam leh wow thooh ki buit wa boon jait.
Da ong u leh wa deiwa ya krehlang hapyrdi kiwa emkti ha ki kaam sumaar sukhær wa ki bor sorkar kamjooh kiwa chong chnong wa ki bru samen daw yarap ko wow sñiawthooh yeiwa emkaam u leh wei iwa emkaam dooh toh yow sikai ya ki paidbah kammon u man ki kiwa tip u im deiwa chait wa khiah deiwa pynchlur leh wow pynmyllien ya ki kaam wa bha wei wow pyntikna wym em kiwa dooh yei yarap wa yatoh wa i chait i khiah.
Da pynsñiaw u leh yei sñiawngooh ya ka Meghalaya Aids Control Society kawa da em hakhmat wow pynman ya kani ka Health Campaign hapoh ka District deiwa e kyrchaan ki bor District wa kiwi kiwa emkti yow man ini waroh iwa jop.
Neiliang won u Mayralborn Syiem leh da ban joor u yei emkaam ini i ya krehlang khamtam wow yaklam ya i kjut HIV/AIDS hapoh ka imlang sahlang wei da ong u wa kam kani ka Integrated Health Campaign toh u pynman cha kiwi ki District leh kamjooh deiwa kyrpaad u ya u Project Director ka Meghalaya Aids Control Society wow pynman ya kam kani ka jooh ha Ri-Bhoi District. Deiwa ong wa kani ka District leh sariem ko waka East Jaiñtia Hills hei rukom em ki jaitbru wa boon jait iwa man leh iwi na i daw wa poor ka HIV/AIDS wei dang emkaam bha wow pynman ya ki pynsñiawthooh paidbah.
Da pynsñiaw u leh yei sñiawkhia yeiwa boon kiwa pynemkaam drugs katni khamtam ki khynroo ka District kamtæ da kyntu u ya kiwa dang lai puræ, ki khynroo khyllood wow yut nei drugs wei wow embynta ha ki kaam wa bha haka imlang sahlang hanla ha kini ki por duna bha ka yoh kaam yoh jam wei kam kiwa mihkhmat paidbah u yaleh ki katwa ye yow pynmih ya ki laad yoh kreh ha ki thaw kreh ki bru samen.
Ha kani ka sngi da pynlait paidbah leh ya ka kari Mobile ICTV Van da u Kyrmen Shylla wa u Mayralborn Syiem.
Waroh kiwa da emlang ha kani ka sngi da chim ki leh ya ka smai wow yaleh pyrchah ya ka HIV, i chah paitkhmat wei chah leh chiliang kiwa em ya uni u khñiang.
Ha kani ka sngi da pynkup burom leh ya waroh kitu kiwa emkti ha kani ka Health Campaign nadooh kiwa kreh ha ka chnat i chait i khiah ka sorkar deilang wa kiwi chnat kam ka District Social Welfare Office, Block Development Officer, MHIS, ki waheh chnong, ka Kyrmen Foundation ki Cement Plant, ki NGO, ka TLS, SETU, 1 LT, SURE, SACS, Bansara Eye Care, Nethralaya, National Institute of Paramedical Technology wa ki College.
Da e khusnaam leh cha ka DISHA Khliehriat wa ki Doctor.
Discussion about this post