Ka tayaaw lehkmen namo ka Annual School Week yong ka Seiñraij Higher Secondary School, Jowai kawa da sdang ha ka 10 tarik uni u bnai da poi ko cha wakut ynne ka sngi heiwa u Dolloi ka Elaka Jowai, u Puramon Kynjing da man u kam u kongsan.
Ha kani tayaw da pynman ya ki yakob wa har rukom neibynta ki khynnah kiwa kynthup ya ki yakob dro dur, ka yatai nia namo ka Debate, ki yakob phet pyllah wa kiwi kiwi.
Ha ka yalang pynkut ynne ka sngi da yoh ya ki kyntien pdiang burom na u D. Lakiang uwa man u Secretary ka SMC, heiwa da pynman ya ka March Pass da ki khynnah yong jar jiar ki House.
U Pa Dolloi hawa e yei klam kam u kongsan da kyrsu kyntu u ya ki khynnah skur kiwa man kam ki symbe yong ka jaitbru yong i wow man ki kiwa kitkhlieh neibynta i burom yong ki ha ki sngi wa daw wan ymtoh du kat wow puræ kot donhi wei emkaam u embynta lang ha kiwon kiwon ki kaam (Extra Curriculum Activity) yong ka skur.
Da ong u leh wa i em kani ka School Week man ko kawa e bor e mynsien ya ki khynnah skur wow pynyoo ki jar jiar i sap wa da e ha ki samen samen da u Tre Kirot Kynrad.
Chooh chooh da ong u wa kiwa jop leh ym hoi u sarong ki, kiwa rem leh ymtoh u sarom ki wei ym kut du heini donhi, manda poi snem won daw yoh biang u embynta kamni yow man biang ki kiwa jop deiwa chimbynta ha ki yakob wa har rukom.
Ha kani ka sngi da yoh leh yei yachut Penaty da kiwa sikai kani ka skur iwa da pynka-it bha ya ki khynnah.
Da yoh ya ki kyntien khublei na u M. Rymbai uwa man u Headmaster ka skur Seiñ Raij Upper Primary School, Jowai wei da pynhiar ya ka lama ka skur da u kongsan.
