Jowai: Deiwi i kyntien u ong kani toh ka Baamphalar wa khaddooh napyrdi ki dong kiwa chim u pynman ya kani ka rukom dustur chisien chisnem. Ya ka Baamphalar yong ka dong Loomkyrwiang da pynman ha kani ka sngi Mulong 20 tarik u Naiynru heiwa da em i lehke drama hei miet wa da thoh da u Phrangsngi Chullai wa u Datammiki Laloo kawa da e pyrtuid “DUJOK” katwa ha ka sngi wa bood wan Musiang da em i baamdoh sñiawbha ha Yungwalieh.
Ya kani ka Baamphalar dawan wow wai da u Deputy CEM JHADC u Andrew Chullai, heiwa ha ka yalang watbian dayoh ya ki kyntien yahkhmat na u Symbood Waheh chnong u Richan Chullai, yei ngoohblai ngoohsyiem da e da siang da u Chanphio Laloo Phawa katwa ya ki kyntien khublei won da yoh na u Tremi Lywait, Secretary KKC.
U General Secretary ka Loomkyrwiang waheh Lammat O Laloo hei e ya ki kyntien dei sñiawsarong niawtang u yei pyrtuid ki warim waheh ka dong Loomkyrwiang kiwa imsngi u tule ya kani ka rukom dustur nadooh i thoh ya ki parom drama, i chna ya ki sur rwai wa kiwi kiwi wei kyrsu kyntu joor u leh ya ki khon khynroo khyllood ka dong wow bood late ki hei wow pynmiat pynbha ya kani ka rukom dustur kat kam i yah ka juk ka por khnang yow bna i naam i burom ka dong ka chnong hakhmat ka pyrthai.
U kongsan yong kani ka Baamphalar u Andrew Chullai hei e ya ki kyntien da yaroh u ya ki khon ka dong ka chnong kiwa yakrehlang da ka luti yong i mynsiem yatylli wei booh u leh ki kyntien e mynsien ya ki khon ka dong dei wa ong neiliang yong oo kam u wa mihkhmat kular u wow yakrehlang katwa joh i buit i bor hei wow pynbiang pyntoh yei duna tymbuiñ iwa ka dong dawa ko wow leh heiyatoh wei man i long yong i Yungwalieh.
Discussion about this post