Ka lympung yalehke Tokyo Summer Paralympics 2020 kawa da sdang nadooh ka 25 Naisaphra, da poi noh ko chawa kut ynne ka sngi heiwa da man ko ka lympung ka wow sahkynmoo ya ka India deiwa yoh ko hadooh 19 tylli ki takma iwa man iwa boon dooh na ki Paralympics kiwa ka ri da chimbynta ko.
Ynne ka sngi ka India da yoh ko ar tylli ki takma heiwa u Krishna Nagar da yoh Takma Ksiar u ha ka Badminton Men’s Singles SH6 katwa u Suhas Lalinakere Yathraj won da yoh Takma Rupa ha ka Badminton Men’s Singles SL4.
Waroh ki takma wa da yoh ka India em ki 19 tylli heiwa na kini 5 tylli toh ki Takma Ksiar, 8 tylli ki Takma Rupa wa 6 tylli ki Takma Tama.
Ya kani ka lympung da pynkut ha ka lehkmen wa pynman ha National Stadium ya kawa da sakhi da u Crown Prince Akishino ka ri Japan.
Neiliang u Montri ka chnat Youth Affairs and Sports ka sorkar pyrdi, u Anurag Thakur da ekhublei u ya ki paidbah ka ri Japan kiwa da ye u pynman ya kani ka lympung kawa jop. Da ong u leh wa kani ka lympung da man ko kawa sah kynmoo ya kiwa yalehke na India kamjooh ki paidbah ka ri.
