Ki kyrtong na ki ar tylli ki Constituency ka East Jaiñtia Hills da sdang ki wow poi cha ka thaw niaw Vote wa da pynman ha yung krehkaam u DC, Khliehriat heiwa yei niaw Vote da sdang chwa da ki Postal Ballot chwa wow sdang ya ki Vote wa em ha ki kor EVM.
Kamwa da pynbna chwa ynnin ka sngi da booh ya ki No Entry ha soodong ka Khliehriat yow khang yei psiah ki paidbah wa kamjooh ki kari yow yoh ki kyrtong kamjooh kiwa kreh Election wow lai u wan deiwa suk heijooh i por leh yow lait na iwon iwon i kulmar.
Hawa yoh u yaklam wa ki kattu katni ki kyrtong, neiliang u Kyrmen Shylla kam u kyrtong ka UDP na 6-Khliehriat Constituency, da ong u wa ynne ka sngi toh kawa da pynkreh ha ki 5 snem deiwa ya kreh chitom neibynta ki khon ka Constituency kamjooh kiwa kyrchaan yong oo beibynta ka mynried ka Constituency wei da angnood u wow yoh yei jop wa pura.
Neiliang won u kyrtong ka VPP na 6-Khliehriat Constituency, u Damewanhi L Rymbai da ong u wa da dep pyndep hok u yei kaam yong oo heiyatoh wow lai pynche paidbah ha ki 64 tylli ki chnong wei myntu u pait yei rai yong ki paidbah kammon da che ki namo ym che ki wei da yooluti u wa ha ka 6-Khliehriat Constituency daw em i kylla ha ka.
