Ka yalang u Sniawbhalang Dhar wa da pynman ha chnong Ksehrynshang ha ka 21 tarik uni u bnai da man ko kawa chong chit heiwa da wan kiwa kyrchaan warim ka ka Congress deilang waka BJP yow psiah cha ka NPP ym duna ya ka 80%.
Ha kani ka yalang da emlang u Waheh Chnong, u Malbi Timung deilang wa kiwi ki waheh waroh heiwa u Malbi Timung toh uwa jooh man kam uwi na kiwa kyrchaan wa uwa yahkhmat ka Congress ha ka Election 2018.
U Malbi da ong u wa ka Ksehrynshang man ko ka Vote Bank yong ka Congress haka Election 2018 tangwa ha kani ka kynti da man ko ka chnong wa da kyruiñ khmat cha u kyrtong ka NPP, u Sniawbhalang Dhar. Kamtæ da e khublei u ya ki paidbah wa chong chnong waroh wa pynyoo ki yei dak yatylli wot hapyrdi i boonkaam wow pynkhreh wow ah kba tangwa da pynlait khnang ki yei por yong ki wow pynyoo yei dak wa ki sakhiat da e ki yei kyrchaan wa pura ya u Sniawbhalang Dhar.
Da ong u leh wa i daw wa pynman ya ki wow kyrchaan ya u Sniawbhalang Dhar wym toh wa yoh myntoi samen lane wa chah theid ki, tangwa wa yoo ki yei kaam wa uni uwa mihkhmat ym em leh chiliang u ya ka chnong yong ki, wei da noh u boon ki kaam pynroi ha ki Balang kamjooh ya ka chnong hanla boon pyrchah ki ha ka Election wa dep ha u 2018.
Da yoh leh yei klam na u Sniawbhalang uwa da ong wa kam uwa mihkhmat dap u dei sñiawkmen hawa yoo u ya ki khon da wan uiñ dien biang ki neiwa sakma ki neibhah da ong u wa oo man u kam u pa ka Constituency wei hawa ki khon jngai ki, i kaamram yong oo kam u pa toh wow lai thooh wow sneiñ ya ki.
Da kyntu u leh ya ki paidbah wym hoi u sñiaw jngai de ki nadooh myntu ka miet wa kattu u man ki chi yung chi sem ha ka satri yong ka NPP wei da kyrpaad u ya kiwa yahkhmat yong oo waroh wow man ki ki bru wa em i maya ya kiwi khnang wa ka yatylli u wan ko hapoh chnong poh thaw.
