U Dalip Singh Rana uwa da tip da kiwa boon kam u “The Great Khali” uwa yaleh Wrestling ka WWE, ynne ka sngi da psiah u cha ka Bharatiya Janata Party (BJP).
U Khali da psiah u cha ka BJP chwa ka Election MLA ka Punjab kawa daw pynman ha ka 14 tarik uni u bnai.
Ya u Khali da pdiang ya oo cha ka BJP ha ka yalang wa da pynman ha National Headquarter ka Party ha New Delhi deiwa emlang u Dr. Jitendra Singh uwa man u Montri khynnah ka sorkar pyrdi wa u Rajya Sabha MP, u Arun Singh.
Neiliang u Khali da pynsñiaw u yei sñiawkmen wa da psiah u cha ka BJP deiwa ong wa u PM Narendra Modi da kreh u neibynta ka ri kamtæ oo leh da kwah u wow embynta lang ha ini i pynroi ya ka ri.
U Khali najrong wa man u kam uwi na kiwa yaslait wa pawnaam ka WWE, da yoh u leh wow embynta ha ki phlim Hollywood kam ka MacGruber, Get Smart waka The Longest Yard.
