Psiah Congress ki BJP cha ka North Shillong neidaw wym yahaap wa i krehkaam ka party

Shillong: Kiwa kitkaam ka BJP North Shillong kiwa da yut dang ini hapoh i yahkmat u Keith Pariat da psiah noh ki cha ka Congress ynne ka sngi ya kiwa da pdiang sñiawbha ya ki da u General Secretary ka AICC u Dr. CP Joshi nalor u president ka Meghalaya Pradesh Congress Committee (MPCC) u Dr. Celestine Lyngdoh ha ka yalang kawa man ynne ka sngi hayung krehkaam ka Congress, Shillong hei emlang u MP u Vincent H Pala, wa kiwi kiwi.

Hawa yaklam wa kini kiwa mih na ka BJP, neiliang u Keith Pariat wa u Wallambok Thangkhiew, u S Warjri wa u William Marbaniang, da ong ki wa i daw wa yut ki na ka BJP toh neidaw i rukom krehkaam yong ka wa i rukom pynlai ha ka party ym yahaap kamwa da yooluti ki. Da ong wa ka BJP da kylla ko na kawa nachwa heipor wa psiah ki ha u snem 2015 wei ka BJP ha kini ki sngi da pynman i ya ki wow yut na ka wei wow psiah noh cha ka Congress.

U Keith da ong u wa i rukom krehkaam ka BJP ym yahaap i ha kini ki sngi kamwa mutdur hapoh i yahkhmat u montri rangbahdooh ka ri wei khamtam i syir mynsien ki bru ya iwa da leh ka BJP.

U President ka MPCC u Dr. Celestine Lyngdoh hawa pdiang sñiawbha ya ki, da ong u wa kini ki waheh da chim ki ya ka luti kawa biang kawa miat heiwa da wan psiah ki cha ka Congress. Da ong u wa ka Congress nadooh u President yong ka u Rahul Gandhi da pdiang ko ya kawon kawon ka yumut wa e da uwon uwon u dkhot lada uwa khian namo uwa heh.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Katwa u Vincent H Pala hawa klam ha kani ka sngi da ong u wa i mih yong ki na ka BJP toh wa chem ki wa ym yahaap katkam watoh u man heiwa da ong u leh wa i psiah ki cha ka Congress ymtoh i wow yoh myntoi samen tangwa neibynta ki paidbah wa ka Party. Da ong u wa ka Congress daw jop ko na ka North Shillong ha kani ka kynti neibhah wa man ko ka party kawa ryntih wa kawa em burom wei kawa pdiang leh ya waroh.

Ha iwi won i liang hei yatoh wa ki kyrtong neibynta ka Election MLA wow wan, u Dr. Celestine Lyngdoh da ong u wa ka party daw pynbna ko ya ki kyrtong pyn hapoh uni u bnai heiwa da yoh pdiang ko hadooh 90 ngut kiwa paan ticket ha kani ka kynti tangwa da ekti bait cha ka AICC wow chim ya ka rai yeiyi u e ticket heiwa da pyntip u leh wa em san ngut ki MLA samen kiwa kwah u yakhun na ka party.

Heijooh i por u Vincent da pyntip u wa ka Congress dang pdiang ko ya kiwa kwah ticket na North Shillong, na West Shillong, na South Shillong wa na Pynthorumkhrah leh wei ya kiwa paan ticket da phah lut yei pyrtuid ki cha u Oscar Fernandes uwa khlieh ya ka AICC wow chim ya ka rai.

Chooh chooh da ong u wa ka Congress daw yakhun bait ko samen ha kani ka kynti khlem yalok wa kawon kawon ka party heiwa da beiñ u ya ka NPP wa ka BJP kiwa em ha kajooh ka rynsan neibhah wa ka NPP ym pynyaleh ko na ki Constituency wa yaleh ka BJP kam ha Raliang.