Ka seiñ Congress kam chibynta i pynkhreh neibynta ka Election MLA wa daw wan da ye ko wow khwe biang ya u MLA ka NCP na Gambegre, u Saleng A Sangma uwa man leh kam u President warim ka Nationalist Congress Party (NCP) uwa da e leh ya ka chithi hiar chuki ynne ka sngi chwa wow psiah cha ka Congress.
Deilang wa u Saleng da psiah leh wa u MDC ka JHADC na Sutnga-Nongkhlieh Constituency, u Richard Lyngdoh wa kamjooh leh u bo ka Agatha Sangma, u Chireng Peter Marak wei da pdiang sñiawbha cha ka Congress da u President ka MPCC, u Vincent H Pala deiwa emlang wa kiwi de kiwa yahkhmat ka Party wa kiwa kyrchaan.
U Saleng toh uwa da dep jop la le sien kam u MLA wei daw yakhun noh u na ka seiñ Congress, katwa u Richard u yakhun Election u na Raliang wei u Chireng Marak daw yakhun u na Kharkuta.
Ka Raliang da man ko kawa da boon ki kyrtong wow yakhun ha kani ka kynti wei kiwa da dep pynbna toh u J. Treilang Suchiang (UDP), u Robinus Syngkon (TMC), u Lakhon Biam (BJP) deilang wa u Richard kiwa man kam ki MDC katni, u Shemhok Garod (PDF) MDC warim wa u MLA ka NPP wa katni, u Comingone Ymbon.
