Ka lympung yalehbol ka Elaka Narpuh Sports Association (ENSA) kawa tip kam ka ‘Elaka Narpuh Football Tournament Champions 2021′ da pteiñ biang ya ka ynne ka 24 tarik da ki yakhun Semi Final wa ar tylli ha madan bol ka Umkiang.
Ha ka Semi Final wa nyngkong da pynman hapyrdi ka Dona Skur FC waka Ratacherra Lumtrom SC heiwa hadooh wa kut i por da neh da 0-0.
Kamtæ da pynman da ka yachut Tie-breaker heiwa ka Ratacherra Lumtrom da jop ko da 3-1.
Ha ka Semi Final wa ar, ka Lumshnong YWSC A da yachem ko ya ka Shymplong heiwa ka Lumshnong da jop ko da 6-1.
Ya ki kool ka Lumshnong da thap da u Justine Niang (6 min), u Maiki Nongtdu (11 min, 26 min, 33 min), u Nelson Rymbai (7 min) wa u Ruki Syrti (68 min). Ya ka Shymplong da thap kool da u Raplang Syih (42 min).
Kamtæ ya ka Final daw pynman ha ka 27-11-21 heipor 12:45 i sngi hapyrdi ka Ratacherra Lumtrom waka Lumshnong YWSC A.
