Shillong: Ka Peoples’ Democratic Front (PDF) ha ka 12 tarik uni u bnai da pdiang sñiawbha ko ya ka MDC yong ka Mylliem Constituency kawa man leh ka Deputy Chief Executive Member ka KHADC, ka Teilinia Thangkhiew wow man ko kam ka kyrtong MDC na ka PDF ha kani ka Election MDC cha ka KHADC.
Ha kani ka sngi da pdiang sñiawbha leh ya kiwa kyrchaan warim ka HSPDP kiwa da psiah cha ka PDF ha ka yalang wa pynman ka PDF ha Madan Iing Syiem, Mylliem.
Ka Teilinia da ong ko wa ha ki por wa da dep da em ko wow yakhun pyrchah wa u MLA, u Hamletson Dohling, tangwa hawa bichaar wei da yoo leh wa uwa mihkhmat kreh bha u ya ka kaam, da sñiawthooh ko wa kreh u neibynta ka Constituency waka jaitbru.
“Hadien waka yaklam wa da lai da ki bnai, nga da chim O ya ka rai wow psiah cha ka PDF wei wow ya krehleng wa u MLA neibynta i bha ki paidbah,” da ong ka Teilinia.
Neiliang u MLA ka Mylliem, u Hamletson Dohling da ong u wa da man ko ka sien wa nyngkong wa kynmoo u wa wa waroh ar ngut kiwa mihkhmat ka thaaiñ u ya tylli ki wow krehlang wei lada ym em kam kani ka krehlang ki paidbah daw jinjar ki.
Da ong u leh wa i rai wow e Ticket ya ka Teilinia ym toh ka rai samen hanlada boon kiwa kreh warim ka Party paan Ticket ki wow yakhun ya ka Election MDC na Mylliem.
“Nga da yaklam O wa kiwa kreh ka Party, hanlada da pynsñiaw ki wa kwah Ticket tangwa smat ki wow kynran dien wow e laad ya ka Teilinia khnang wa ka Party u yoh biang ko ya i jop ha kani ka Election,” ong u Hamlet.
Discussion about this post