Ka Meghalaya Pradesh Congress Committee (MPCC) ynne ka sngi da pdiang sñiawbha ko ya u Erwin K Sutnga cha ka Party ha ka yalang wa pynman ha yung krehkaam ka seiñ ha Shillong.
Ya u Erwin da pdiang sñiawbha da ki Working President, u Pynshngain N Syiem, u MDC u Charles Marngar wa kiwi kiwa kitkaam ka Party Congress. U Erwin toh u muktiar wei da embynta u ha ka saiñpyrthai, heiwa da dep yakhun u leh ya ka Election ini wadep.
U Erwin da ong u wa ini i liwan biang u cha yung toh neibhah heipor wa dadep da jooh man u kam u General Secretary ka Youth Congress. Da ong u wa ka Indian National Congress (INC) toh kawi na ki Party wa heh hapoh ka jylla Meghalaya, kawa da e chakri da slem wei toh lyngba ka Congress wa da yoh leh ya ka jylla Meghalaya.
Da yaroh u ya ka Congress deiwa ong wa man ko ka seiñ wa da wanrah boon ki kaam pynroi wei da kreh ko khlem ñiaw chiliang ha iwon iwon i liang nadooh ka niam lane yei dooh i duk.
U Erwin da pynsñiaw u yei dooh kyrmen ya ka sorkar Meghalaya Democratic Alliance (MDA) wa yahkhmat ka NPP, heiwa da ong u wa ka jylla em ko hei eh wa chyrkhei.
