Shillong: Hadien wa mih u na ka United Democratic Party (UDP), u Hamlet Dohling ynne ka sngi da psiah noh u cha ka People Democratic Party (PDF) ha ka yalang kawa da pynman ha ka Dorbar Hall, Umlyngka.
Ya u Hamlet da synran lang da kiwa kitkaam ka UDP kiwa da bood ya oo na ka Mylliem Circle, heiwa da em leh ki paidbah kiwa da kyrchaan ya oo na kylleiñ heiwa da em leh ki heh ka PDF seiñbei wa u President yong ka u Ivan Marbaniang.
Hawa klam ha kani ka yalang u Hamlet da kam u wa ym du ki bru yong oo kiwa da jooh kyrchaan ya oo ha kini ki snem wa da dep tangwa ha kani ka kynti leh da emlang ki wa kyrchaan ya ka Congress wa ka HSPDP tangwa ympu kwah u wow pynmih pyrtuid yong ki ki wa daw bood oo.
U Hamlet da beiñ joor u ya u MLA uwa man leh u montri ka sorkar u Ronnie V. Lyngdoh uwa da khlai ya ki kyntien nachwa wa daw resign u kam u MLA lada wan ka Meghalaya Urban Development Authority (MUDA) cha Mylliem tangwa hadooh katni wa da wan tia pood ka MUDA leh u Montri suki hi-eh u.
Da ong u wa ymphær hanlada u Lyngdoh ym resign u tangwa ki paidbah ha u 2018 u pyndam noh ki oo kam u MLA.
Katkam ka yutip RTI na ka Urban Affairs heiwa da kylli wa ka MUDA krehkaam ko namo ym em ha Mylliem, da ong wa ka MUDA da krehkaam ko chadooh Mylliem, nadooh Lummawbah chadooh Hynniewmer, da ong u Hamlet wei wow pynkylla yeini emkaam wa ki paidbah u sñiawthooh ki wow pynkylla noh ya kiwa mihkhmat.
Da pyntip u leh wa ka UDP da tyrwa ko ya oo wow man kam u Chairman lada dam u wow yaleh Election ha uni u 2018 wei neiliang yong oo da kyntait u yeini neibhah wym myntoi u pyrkhat yei myntoi samen tangwa angnood u wow kreh neibynta ki paidbah.
Ha iwi tawon i liang u president ka PDF, u Marbaniang da ong u wa oo ym yohpor u wow pakhot ktieh ya ki bru kiwa beiñ wa sin ya ka PDF.
“Ka PDF toh ka manyung kawa dang thymme wei toh i kaamram yong nga wow pyllang khnang wow ye u tei neibynta iwa bha yong kani ka manyung” da ong u president.
Discussion about this post