I kynthih yong kiwa boon kiwa mihkmat paidbah kiwa man MDC wa ki MLA warim cha ka National People’s Party (NPP) da pteiñ i heiwa ynne ka sngi ki MDC ka KHADC kitæ ka Grace Mary Kharpuri, ka MDC na Nongshken, u Fantin Joseph Lakadong, u MDC ka Malki Laitumkhrah wa u W. L. Mynsong, MDC warim ka Jirang da psiah ki kam ki dkhot wa pura cha ka NPP.
Ha kani ka yalang pdiang burom ya ki MDC wa pynman ha yung krehkaam ka Party da pdiang sñiawbha ya ki MDC da u National President uwa man leh u Montri Rangbah ka jylla, u Conrad K Sangma deiwa emlang u National Vice President, u Prestone Tynsong wa u Sniawbhalang Dhar najrong kiwi ki wakreh wa ki MLA yong ka NPP.
Hawa klam ha ka yalang, waroh 3 ngut kiwa da psiah thymme cha ka NPP da e yaroh ki ya ka Party wa kiwa yahkhmat neibhah wa smat ki wow ap u sñiaw wei wa man ki kiwa yatylli.
U Conrad K Sangma hawa klam ha kani ka sngi da pynsñiaw u yei kmen yei wan psiah kiwa yahkhmat na ki bynta waphær yong ka jylla, heiwa da ong u leh wa ka Party ka krehkaam ko hajrong ka yurim wa biang deiwa ya krehlang kiwa yahkhmat neibhah waroh ki dkhot kiwa em ha ka Party man ki kiwa kyrpang wa kiwa emkaam.
U heh dooh ka NPP da ong u leh ha ka ktien Khasi, wa ka NPP daw jop ko samen ha u snem wow wan wei emkaam wow kreh chitom iwa mut wa daw synchaar samen hapoh ka jylla hadien ka Election.
